काठमाडौँ। लुक्लामा हिजो आइतबार बिहान भएको समिट एयरको विमान दुर्घटनामा तीन जनाको मृत्यु भएको छ। मृत्यु हुनेमा समिट एयरका कोपाइलट सुदिप ढुंगाना ,विमानस्थल सुरक्षामा खटिएका नेपाल प्रहरीका असई रामबहादुर खड्का र असई रुद्रबहादुर श्रेष्ठ रहेका छन ।
सोलुखुम्बुबाट रामेछापको लागि उड्न लागेको जहाज धावनमार्गमा चिप्लिएर हेलिकोप्टरसंग ठोक्किदा उक्त घटाना भएको हो ।
विभिन्न प्रतिवेदनहरुले सोलुखुम्बुको लुक्लास्थित तेञ्जिङ हिलारी विमानस्थललाई विश्वकै खतरनाक विमानस्थलमध्ये एक भएको जनाएका छन्। यस अघि लुक्ला विमान स्थलमा विगत दुई दशकमा भएका हवाई दुर्घटनाहरु यस प्रकार छन्।
- २५ मे २००४ – काठमाडौँबाट लुक्ला जाने क्रममा यति एयरलायन्सको डिएचसी ६–३०९ डी ट्विनअटर विमान दुर्घटना भयो। लाम्जुरा पहाडमा खराब मौसमका कारण विमान ठोक्किदा चालक दलका तीन सदस्यको मृत्यु भयो।
- १ अक्टोबर २००४ – सीता एयरवेजको डोर्नियर–२२८ विमान लुक्ला विमानस्थलमा आवतरणका क्रममा दुर्घटनाग्रस्त बन्यो। यो दुर्घटनामा भने मानवीय क्षति भएन ।
- ३० जुन २००५ – लुक्ला विमानस्थलको धावनमार्गमा गोरखा एयरलाईन्सको डोर्नियर–२२० विमान धस्सिएर दुर्घटना भयो। दुर्घटना कसैको ज्यान नगएपनि चालक दलका तीन र त्यसमा सवार नौ जना यात्रु घाइते बने।
- ८ अक्टुबर २००८ – यति एयरको विमान दुर्घटनामा पर्यो । यति एयरको नाइन एन–एएफई कलसाइनको विमान दुर्घटना हुँदा १८ जनाले ज्यान गुमाए भने १ जना बाँच्न सफल भए ।
- २७ मे २०१७ – लुक्लामा गोमा एयर (हाल समिट एयर) को कार्गाे विमान दुर्घटना भएको थियो। दुर्घटनामा पाइलट र कोपाइलट गरी दुई जनाको मृत्यु भएको थियो। विमान अरु यात्रु भने थिएनन्।
- १४ अप्रील २०१९ – सोलुखुम्बुबाट रामेछापको लागि उड्न लागेको समिट एयरको विमान दुर्घटनामा भएको छ। दुर्घटनामा कोपाइलट र विमानस्थल सुरक्षामा खटिएका नेपाल प्रहरीका दुई असई सहित तीन जनाको मृत्यु भएको छ।
- तस्विरमा माथि बायाँ पहिलो यति एयर दुर्घटना २००८ , दायाँ गोमा एयर दुर्घटना २०१७ , तल दुई तस्विर समि समिट एयर दुर्घटना २०१९
