बागलुङकै जेठो शैक्षिक थलो विद्यामन्दिर माविको विद्यालय व्यवस्थापन समितिको अध्यक्षमा बावुलाल शाक्य चयन भएका छन् ।समितिको सदस्यमा मुकेशचन्द्र राजभण्डारी ,रितादेवी शर्मा माया बस्नेत, पारस केसी र पुष्पा शर्मा चयन भएका छन् ।
शनिवार सम्पन्न अभिभावक भेलाले सर्वसम्मत रुपमा बावुलाल शाक्य,मुकेशचन्द्र राजभण्डारी,माया बस्नेत र रितादेवी शर्मालाई चयन गरेको थियो । आइतवार बसेको समितिको पहिलो बैठकले पारस केसी (इन्द्र) र पुष्पा शर्मालाई मनोनित गरेको छ ।
त्यस्तै वडा प्रतिनिधिबाट वडा अध्यक्ष लक्ष्मी बाँस्कोटा र सदस्य सचिवमा विद्यालयका प्रधानाध्यापक शान्तामणि ढकाल चयन भएका छन् ।समितिमा शिक्षक प्रतिनिधि रहने व्यवस्था रहेकोमा शिक्षक प्रतिनिधिको छनोट प्रक्रियाका विषयमा आवश्यक गृहकार्य भैरहेको प्रधानाध्यापक शान्तामणि ढकालले बताए ।
विद्यालयमा सुवासचन्द्र राजभण्डारीको अध्यक्षतामा गठित विद्यालय व्यवस्थापन समितिको कार्यकाल सकिएपछि नयाँ समिति गठन भएको हो । विं.सं. १९९७ मा राणाशासनको समयमा ओमप्रसाद गौचन, मेघकुमार वैद्यले स्थापना गरेको विद्यामन्दिर साविक नेपालमा खुलेको विद्यालय मध्य इतिहास बोकेको पुरानो विद्यालय हो ।
सस्थापक गौचनले तत्कालिन समयमा विद्यालयमा पुस्तकालय ,संगीत कक्षा र घरेलु सिपको समेत व्यवस्था गरेका थिए । २०७२ सालको भूकम्पले क्षति पुगेको विद्यालयमा धनधान्याचल महायज्ञबाट रकम जुटाई अहिले सुविधासम्पन्न भवन बनाइएको छ ।
महायज्ञमा करिब ७ करोड रकम संकलन भएको थियो । त्यसमध्ये करिब पाँच करोड रुपैयाँ पूर्वविद्यार्थीहरूको योगदान रहेको छ । विद्यालयमा अहिले बाल कक्षादेखि कक्षा १२ सम्म ११ सय ३५ विद्यार्थी अध्ययनरत छन् । विद्यालयमामा विज्ञान,व्यवस्थापन, शिक्षा र मानविकि समूहमा अध्यापन हुँदै आएको छ ।
