एक साताभित्र निम्न माध्यमिक तह शिक्षक पदपूर्तिका लागि विज्ञापन आह्वान गरिने भएको छ । शिक्षक सेवा आयोगले यस पटकबाट परीक्षणका रुपमा अनलाइनमाध्यमबाट आवेदन लिन थालेको हो ।
आवेदकको सङ्ख्या एकै पटक ह्वात्तै बढेपछि सर्भर नै डाउन हुने डरले क्रमशः हरेक तहको विज्ञापन आह्वान गर्ने रणनीति आयोगले लिएको हो ।
आयोगका सूचना अधिकारी सुदर्शन मरहठ्ठाले यही पुस १० गतेभित्र निम्न माध्यमिक तहका लागि विज्ञापन आह्वान भइसक्ने र पुस २१ गतेभित्र प्राथमिक तहको विज्ञापन अह्वान गरिसक्ने बताए ।
अनलाइन प्रणालीले अहिलेसम्म माध्यमिक तहको राम्रै काम गरेको छ, सर्भरमा कुनै समस्या आएको छैन उनले भने ।” आयोगका अनुसार माध्यमिक तहमा शुक्रबारसम्ममा ३०५ जनाले फाराम भरेका छन् भने ७४ जनाले रकम नै तिरेर प्रवेश पत्र प्राप्त गरिसकेका छन् ।
माध्यमिक र निम्न माध्यमिक तहभन्दा बढी प्राथमिक तहका आवेदक बढी हुने गरेका छन् । त्यतिञ्जेल माध्यमिक तहमा आवेदन भर्न चाहनेहरुले करिब करिब आवेदन दिइसकेका हुनेछन् भन्ने आयोगका अनुमान छ ।
माध्यमिक तहमा पुस २९ गतेसम्ममा आवेदन दिन सकिनेछ भने दोब्बर दस्तुर तिरेर आगामी माघ ६ गतेसम्म आवेदन भर्न सकिन्छ ।
राज्यले हाल माध्यमिक र आधारभूत तह निर्धारण गरिसके पनि आयोग अझै पुरानै तीन तहमा विज्ञापन आह्वान गर्दैछ । आयोगका सूचना अधिकारी मरहठ्ठाले शिक्षा नियमावलीमा परिवर्तन नभइसकेकाले माध्यमिक, निम्न माध्यमिक र प्राथमिक तहमा विज्ञापन आह्वान गर्नुपरेको बताए ।
“शिक्षा तथा मानव स्रोत विकास केन्द्रले पनि तीन तहका लागि विवरण पठाएको हुँदा पनि सोहीअनुसार शिक्षक माग गरिएको हो” उनले भने ।
“स्थायी कार्यरतबाहेक २०३८ साल पुस २९ गतेभन्दा यता जन्मिएकाले आवेदन दिनसक्छन् । त्यसभन्दा अघि जन्मिएकाले आवेदन दिनसक्ने पाउँदैनन्” उनले भने । स्थायी कार्यरतका लागि उमेरको हदबन्दी छैन ।
