बागलुङ। बचतकर्ताहरुको अरबौं रकम हिनामिना गरि भागेका इमेज बचत तथा ऋण सहकारीका अध्यक्ष देवकुमार नेपालीलगाएत अन्य सञ्चालकहरुलाई तत्काल पक्राउ गरि बचतकर्ताहरुको रकम फिर्ता दिन नेकपा बागलुङले माग गरेको छ ।
शुक्रबार बागलुङ नगरपालिका वडा नं २ हल्लन चोकको इमेज सहकारीको कार्यालय अगाडि विरोधसभा आयोजना गरि बचतकर्ताहरुको माग पुरा गर्न अपिल गरेको हो ।
अरबौं रकम हिनामिना गरि बचतकर्ताहरुलाई बिचल्ली बनाउने देवकुमार नेपालीलाई पक्राउ गरि सर्वसाधारण जनताको पैसा फिर्ता गर्न प्रहरी प्रशासनले तत्काल कदम चाल्नु पर्ने नेकपा बागलुङका जिल्ला ईन्चार्ज आकाश सिले भन्नु भयो ।
शिव शिखर सहकारी र इमेज सहकारीका सञ्चालकहरुले सर्वसाधारण जनताको अरबौं रकम हिनामिना गर्दा पनि जनप्रतिनिधि, स्थानीय सरकार, प्रहरी, प्रशासन, सहकारी शाखा, सहकारी विभाग र गृह मन्त्रालयले प्रभावकारी ढंगले काम नगरेकाले बचतकर्ताहरु निरास र आक्रोशित भएको आकाश सिले भन्नु भयो ।
कार्यक्रमको संचालन नेकपा जिल्ला समिति बागलुङका सेक्रटरी क्रान्ति सिले गर्नु भएको थियो ।