काठमाडौँ । बचतकर्ताहरुको २ अर्ब रुपैयाँ हिनामिना गरी ६ महिनादेखि फरार ढोरपाटन नगरपालिकाका नगर प्रमुख तथा इमेज बचत तथा ऋण सहकारी संस्थाका अध्यक्ष देव कुृमार नेपालीले समाजिक संञ्जाल फेसबुकमार्फत जिउधनको सुरक्षा नभएका कारण भाग्नु परेको बताएका छन् ।
गत कार्तिक ३० गते एक वक्तव्य र भिडियो आफनो फेसबुकमा प्रकाशित गरी आफनो र आफनो श्रीमती छेला नेपाली, छोरी कर्मा नेपालीलाई हतियार सहित आएर ज्यान मार्ने धम्की आएकोले सुरक्षाको कारण केहि समय सम्पर्क विहिन हुन बाध्य भएको वक्तव्यमा उल्लेख छ ।
नेपालीले आफ्नो चल अचल सम्पती पुरै बागलुङमा रहेको भन्दै आफू ढोरपाटन नगरपालिकाको काममा व्यस्त हुँदा कर्मचारीले ठिक ढंगले सहकारी नचलाएको आरोप लगाएका छन् । इमेज सहकारीमा बचतकर्ताहरुले भनेजस्तो पुरै डिपोजिट नभएको र करोडौ डिपोजिट रहेको बताएका बचतकर्ताले कर्जा मार्फत अधिकाशं रकम फिर्ता लगिसकेको समेत उनले बताएका छन् ।
नेपालीले इमेज पीडित संघर्ष समितिले गर्नु परेको संघर्ष र दुखको लागि धन्यवाद दिदै सबै निवेदकले दिएको जाहरीमा सत्यता नभएको र खातामा १० हजार हुनेले दश लाखको समेत दाबी गरेको र कर्जा लगेका कतिपय ऋणिले कर्जा नलगेको भनेर अटेर गरेको उनले आरोप लगाएको छ ।
साथै उनले आफूले बागलुङ, कास्की र काठमाडौंमा १८ वटा घर र ४४ कित्ता जग्गा जस्को हालको मूल्य ३ अर्ब हुन आउने सम्पत्ति जोडेको दाबी गर्दै उक्त सम्पत्ति सहकारीको पैसाले नकिनेको दाबी गरेका छन् ।
उनलाई असफल बनाउन राजनीति पनि भएको र त्यसको विषयमा आफूले पछि खुलासा गर्ने वक्तव्यमा उल्लेख छ ।अध्यक्ष नेपालीले यो वक्तव्य कहाँबाट निकालेको हो र उनी कहाँ छन् भन्ने बारेका अझसम्म केहि थाहा हुन सकेको छैन् ।
(देवकुमार नेपालीले आफनो फेसबुकमा राखेको भिडियो)
