बागलुङ । मानवसेवा आश्रम बागलुङको भवन निर्माण र कोष स्थापनाको लागि बागलुङ नगरपालिका–२ जिपपार्कस्थित युएस एकेडेमीले रु ५६ हजार ७ सय ६९ सहयोग प्रदान गरेको छ ।
आश्रमको भवन बनाउने र कोष निर्माण गर्ने पवित्र उद्देश्यका साथ सुरु भएको महायज्ञलाई सफल बनाउन शुक्रबार आर्थिक सहयोग हस्तान्तरण गरिएको युएस एकेडेमीका प्रिन्सिपल अशोक केसीले नयाँविश्वलाई जानकारी दिनु भयो ।
विद्यालयले सामाजिक, जनस्वास्थ्य, धार्मिक र मानविय क्षेत्रमा सहयोग गर्दै आएको युएस एकेडेमीका निर्देशक दलबहादुर थापाले बताउनुभयो । उक्त रकम विद्यालय, शिक्षक र कर्मचारीबाट संकलन गरिएको विद्यालयले जनाएको छ ।
बागलुङ नगरपालिका–४ निरयघाटमा आश्रमको निर्माणाधीन भवन चैत्र मसान्तभित्र सम्पन्न गर्ने लक्ष्यसहित कात्तिक २१ गतेदेखि सुरु भएको महायज्ञ कार्तिक २९ गते समापन हुने श्रीमद् भागवत् सप्ताह ज्ञानविज्ञान महायज्ञ आयोजक समितिका अध्यक्ष सहदेव राजभण्डारीले जानकारी दिनुभयो ।
महायज्ञको सातौं दिनसम्म रु ८ करोड ९४ लाख संकलन भएको महायज्ञका सचिव युक्त प्रसाद सुवेदीले बताउनु भयो । भवन निर्माणका लागि हालसम्म ५ करोड रकम खर्च भइसकेको र निर्माण पूर्ण रूपमा सम्पन्न गर्नका लागि अझै रु ४ करोड आवश्यक रहेको आश्रमले जनाएको छ । महायज्ञमा भवन निर्माणको लागि लाग्ने रकम बाहेक अरु रकम कोषमा राख्ने आयोजकले जनाएको छ
महायज्ञबाट संकलित रकम भवन निर्माण र अक्षयकोष श्रीवृद्धिमा लगानी गरिने आश्रमका अभिभावक निर्मलबहादुर श्रेष्ठले बताउनुभयो । महायज्ञको कथा वाचन भागवत् भास्कर कमलनयन गौतमले गर्नुभएको थियो ।
