बागलुङ समाज कल्याण केन्द्र महिला समूहकी कोषाध्यक्ष तथा इनर ह्विल क्लब अफ बालाजुकी कार्यसमिति सदस्य मन्दिरा श्रेष्ठले मानव सेवा आश्रमलाई आर्थिक सहयोग उपलब्ध गराएकी छिन् । काठमाडौं, वटुनिवासी उनले ५० हजार नगद सहयोग गरेकी हुन् ।
मानवसेवा आश्रम काठमाडौं शाखाको छैटौं वार्षिकोत्सवको उपलक्ष्यमा श्रेष्ठले उक्त सहयोग गरेकी हुन् । ‘आश्रमले घरभाडासमेत तिर्न नसकेको र काठमाडौं महानगरपालिकाबाट आउने सहयोग पनि रोकिएको थाहा पाएपछि सामाजिक उत्तरदायित्व महसुस गरी रकम उपलब्ध गराएकी हुँ,’ श्रेष्ठले भनिन् ।
उनले आश्रममा रहेका दुई जनाको अभिभावकत्व पनि लिएकी छिन् । श्रेष्ठले आश्रितहरूको पालनपोषण र औषधोपचारमा सघाउन मासिक दस हजार रुपैयाँ सहयोग पनि गर्दै आएकी छिन् । ‘मैले श्रीमान् मथुरा श्रेष्ठ र छोरा अनमोलसँग सल्लाह गरेर यस्तो आपतको बेला आश्रमलाई सानो सहयोग उपलब्ध गराएकी हुँ,’ उनले भनिन् ।
विद्यालय, सामुदायिक भवन, खानेपानी, धार्मिक क्षेत्रका संरचना निर्माणमा पनि सघाउँदै आएको श्रेष्ठ परिवारले देशमा दैवी प्रकोप पर्दा पनि सहयोग गर्दै आएको छ ।
श्रेष्ठले यसअघि असार २५ र २६ गते म्याग्दीमा आएको बाढीपहिरोले विस्थापित भएकाहरूलाई खाद्यान्न, लत्ताकपडा, औषधि र नगद सहयोग गरेकी थिइन् । धौलागिरि गाउँपालिका–७ मराङ, धारापानी र मालिका गाउँपालिका–७ को बिम गाउँमा पुगेर उनले २ सय ५० परिवारलाई राहत बाँडेकी थिइन् ।
