लोपोन्मुख स्थानीय जातका गाईको संरक्षणका लागि जलजला गाउँपालिका–७ मिलनचोकमा हुने गण्डकी गौरक्षा गौशाला धनधान्याचल विराट् ज्ञान महायज्ञ एवं गौ महोत्सवको मिति नजिकिँदै गर्दा सहयोगी दाताको ओइरो लागेको छ ।
जलजला गाउँपालिका ७ मिलनचोकमा रहेको लुङ्दी जलजला बहुउद्देश्यीय सहकारी संस्थाले १० लाख रुपैयाँ सहयोग गर्ने भएको छ ।
सहकारीको ११औं वार्षिक साधारणसभाबाट मंसिर १९ देखि २६ सम्म हुने महोत्सवलाई उक्त रकम सहयोग गर्ने निर्णय भएको सहकारीका प्रबन्धक टेकनारायण आचार्यले जानकारी दिए ।
१० लाख सहयोग गरेबापत सहकारीलाई महायज्ञमा एक दिन सभानायक बनाइने महोत्सवका उपाध्यक्ष शिव जिसीले बताए । सहकारीले गौशालालाई यसअघि पनि आर्थिक सहयोग गर्दै आएको उनले जानकारी दिए ।
स्वामी कमलनयनाचार्यको पहल र स्थानीयको सक्रियतामा २०७२ मा धाइरिङमा स्थापित गौशालाको क्षमता विस्तार, व्यवस्थापन, आवश्यक संरचना निर्माण गराउने र अक्षयकोष स्थापना गर्ने उद्देश्यले महायज्ञ आयोजना गर्न लागिएको हो ।
कालीगण्डकी र लुङदी नदीको दोभानमा हुने महायज्ञको प्रचारप्रसार र व्यवस्थापन तीव्र पारिएको महायज्ञ मूल आयोजक समितिका अध्यक्ष राजु आचार्यले बताए ।
