नेपाल उद्योग वाणिज्य महासंघको आसन्न निर्वाचनका लागि वरिष्ठ उपाध्यक्षका उम्मेदवार चन्द्रप्रसाद ढकाल समूहले जिल्ला तथा नगर, वस्तुगत र एसोसिएट्सतर्फबाट केन्द्रीय सदस्य पदमा उम्मेदवारी दर्ता गराएको छ ।
निर्वाचन कार्यालयसमेत रहेको नेपाल उद्योग वाणिज्य महासंघको केन्द्रीय कार्यालय पुगी ढकाल प्यानलका विभिन्न व्यक्तिले उम्मेदवारी दर्ता गराएका हुन् ।
वस्तुगततर्फ केन्द्रीय सदस्यमा हेमराज ढकाल, आकाश अधिकारी, कमला श्रेष्ठ, जय सिवाकोटी, सुवास भण्डारी, प्रकाशसिंह कार्की, भक्त हमाल, सुबोधकुमार गुप्ता, सुमित केडिया, रविनकुमार श्रेष्ठ, नरेशलाल श्रेष्ठले उम्मेदवारी दर्ता गराएका छन् ।
यस्तै जिल्ला नगरतर्फबाट अशोक ताम्राकार, तारानाथ घिमिरे, उमेश डामियालगायतले उम्मेदवारी दर्ता गराएका छन् । साथै एसोसिएट्सतर्फ ढकाल प्यानलबाट अजित बस्नेत, अम्बिकाप्रसाद पौडेल, रामशरण थपलिया, भरत आचार्य, विनोद ढकाल, विराट थापा, गोपाल खनाल, कृष्णलाल महर्जन, बाबुकाजी कार्कीलगायतले उम्मेदवारी दर्ता गराएका छन् ।
मनोनयन स्थलमा पुगेका वरिष्ठ उपाध्यक्षका उम्मेदवार ढकालले निजी क्षेत्रका आर्थिक मुद्दा उठाउन साना, मझौला र ठूला उद्योगी–व्यवसायी मिलेर अगाडि बढ्नुपर्ने बताए । सबै प्रकारका व्यवसाय सञ्चालन गरी विदेशी लगानीसमेत प्रवर्धन गर्ने उल्लेख गर्दै उनले देशविदेशमा रहेका लाखौं नेपालीका लागि रोजगारी सिर्जना हुने औद्योगिक वातावरण सिर्जना गर्ने बताए ।
महासंघको ५४औं वार्षिक साधारणसभा तथा निर्वाचन आगामी मंसिर ११, १२ र १३ गते काठमाडौंमा हुँदै छ । ढकाल प्यानलबाट वस्तुगत उपाध्यक्षमा उमेशलाल श्रेष्ठ, जिल्ला,नगर उपाध्यक्षमा गुणनिधि तिवारी र एसोसियट उपाध्यक्षमा रामचन्द्र सांघाईले पनि उम्मेदवारी दर्ता गराइसकेका छन् ।
ढकाल प्यानलबाट जिल्ला तथा नगर, वस्तुगत र एसोसिएट्सतर्फबाट केन्द्रीय सदस्य पदमा केहीले उम्मेदवारी दिन बाँकी रहेको बताइएको छ । केन्द्रीय सदस्य पदका उम्मेदवारहरूले पनि केही दिनभित्रै उम्मेदवारी गर्दा गराउने पनि उपाध्यक्षका उम्मेदवार ढकालले जानकारी दिए ।
प्रधान समूहको पनि उम्मेदवारी दर्ता
नेपाल उद्योग वाणिज्य महासंघको आगामी निर्वाचनका लागि किशोर प्रधान समूहले उम्मेदवारी दर्ता गरेको छ । वरिष्ठ उपाध्यक्षका प्रत्याशी प्रधानले सोमबार बिहान उम्मेदवारी घोषणा गरेका थिए । प्रधान समूहले दिउँसो महासंघमा उम्मेदवारी दर्ता गरेको हो ।
जिल्ला नगर उपाध्यक्षमा दिनेश श्रेष्ठ, वस्तुगत उपाध्यक्षमा अन्जन श्रेष्ठ, एसोसिएट उपाध्यक्षमा सौरभ ज्योतिलगायत अन्य उम्मेदवारले प्रत्यक्ष र अनलाइनमार्फत उम्मेदवारी दर्ता गराएका छन् ।
सो अवसरमा महासंघका वरिष्ठ उपाध्यक्ष तथा ‘वेटिङ प्रेसिडेन्ट’ शेखर गोल्छाले आफ्नो सबैभन्दा पहिलो काम महासंघलाई राजनीतिबाट अलग राख्ने रहेको बताए ।
‘महासंघमा राजनीति भनेको क्यान्सर हो । हामी त्यहाँ राजनीति होइन, काम गर्न जान लागेका हौं,’ उनले भने, ‘मैले विभिन्न अर्थविज्ञहरूसँग परामर्श गरेर एउटा भिजन बनाएको छु । मेरो कार्यकालमा देशको अर्थतन्त्रलाई अझ बढी बलियो बनाउने मुख्य काम हुनेछ ।’
वरिष्ठ उपाध्यक्षका लागि दसैंअघि चन्द्रप्रसाद ढकालले प्यानलसहित उम्मेदवारी दर्ता गराइसकेका छन् । महासंघमा वरिष्ठ उपाध्यक्ष स्वतः अध्यक्ष हुने प्रावधान छ ।
तस्वीर : नेपाल खबर र क्यापिटलनेपालबाट
