पुतलीसडकस्थित कर्पोरेट कार्यालयको लिज अवधि सकिएपछि सेन्चुरी कमर्सियल बैंकले अब आफ्नै भवन व्यवस्थापन गर्ने भएको छ । यसका लागि बैंकले जग्गा मात्रै वा घरसहित खरिदका लागि सार्वजनिक सूचना जारी गरेको छ ।
बैंकका प्रमुख कार्यकारी अधिकृत तुलसीराम गौतमले अहिले बसेको घरको सम्झौता अवधि सकिएकाले थप दुई वर्ष समय मागेर नयाँ घरमा सर्ने तयारी गरिएको हो ।
बैंकले चार रोपनी जग्गा खोजेको छ। सूचनामा उल्लेख भएअनुसार भवनसहितको जग्गा भए ६० हजार वर्ग फिट पार्किङ एरिया हुनुपर्छ। जसमा सयवटा बाइक र ६० वटा गाडी अट्ने हुनुपर्छ ।
बैंकले ५० करोड रुपैयाँ हाराहारीको जग्गा खोजेको छ। नक्साल, त्रिपुरेश्वर, टेकु, थापाथली, लाजिम्पाट, नयाँ बानेश्वर, बालुवाटार, चक्रपथ आसपास, पुल्चोक, जावलाखेल, कोटेश्वर, ज्ञानेश्वर तथा आसपासका क्षेत्रका साथै धोबीखोला र वाग्मती करिडोर क्षेत्रको जग्गा वा भवन
आवश्यक रहेको सूचनामा उल्लेख छ । ‘हामीले वैशाखबाटै जग्गा वा भवन खोजी गरेको हो। भेटिएको छैन।
अब उपयुक्त मूल्यसहितको घरजग्गा भेटिएन भने पनि भाडामा अर्कोतिर सर्नुपर्ने हुन्छ,’ गौतमले भने, ‘केही समयभित्र नभेटिए भाडाको घर खोज्नतिर लाग्छौं।’
