काठमाडौं उपत्यकामा एक साता निषेधाज्ञा लम्ब्याउने निर्णय गरिएको छ । काठमाडौं उपत्यकाका प्रमुख जिल्ला अधिकारीहरूले आइतबार निषेधाज्ञा थप गर्ने निर्णय गरेका हुन् ।
निषेधाज्ञाको समय असार ७ गतेसम्म थप गरिएको भक्तपुरका प्रमुख जिल्ला अधिकारी प्रेमप्रसाद भट्टराईले बताए । वैशाख १६ बाट जारी निषेधाज्ञा पछिल्लो पटक जेठ ३१ सम्म लम्ब्याउने निर्णय गरिएको थियो ।
काठमाडौं उपत्यकाका प्रमुख जिल्ला अधिकारीहरूनिषेधाज्ञाको मोडालिटीसमेत परिवर्तन गरेका छन् ।आइतबारको निर्णयअनुसार होटल रेस्टुराँले अब ‘टेक अवे’ सेवा सुरु गर्न पाउने भएका छन् ।
अनलाइनमार्फत अर्डर लिएर बिहान ७ बजेदेखि टेक अवे सेवा दिन पाउने निर्णय गरिएको काठमाडौंका प्रमुख जिल्ला अधिकारी कालीप्रसाद पराजुलीले बताए ।
बैठकमा काठमाडौंका प्रजिअ पराजुली, भक्तपुरका प्रजिअ प्रेमप्रसाद भट्टराई र ललितपुरका प्रजिअ ढुण्डीप्रसाद निरौला सहभागी थिए । त्यस्तै, खाद्यान्न, डिपार्टमेन्ट स्टोर र फलफूल पसल बिहान ११ बजेसम्म खोल्न दिने निर्णय गरिएको छ ।
‘पुस्तक पसल पनि खोल्न पाउने निर्णय गरेका छौं,’ प्रजिअ भट्टराईले भने, ‘पुस्तक पसल पनि बिहान ११ बजेसम्म खोल्न पाइन्छ ।’ वैशाख १६ बाट जारी निषेधाज्ञालाई निरन्तरता दिँदै जेठ १४ बाट सो आदेशलाई थप कडा पारिएको थियो ।
जेठ १४ बाट उपत्यकामा बन्द गरिएको खाद्यान्न, किराना तथा डिपार्टमेन्ट स्टोर जेठ २१ बाट पुनस् खोल्न दिइएको थियो । किराना र डिपार्टमेन्ट स्टोर यसअघि बिहान ९ बजेसम्म मात्र खोल्न पाइन्थ्यो ।
सार्वजनिक निर्माणमा प्रयोग हुने निर्माण सामग्री रातको समयमा मात्र ढुवानी गर्न पाइन्छ । काठमाडौं उपत्यकामा दिउँसो ४ बजेबाट हार्डवेयर सामग्री बेच्ने पसल खोल्न दिने निर्णय गरिएको छ । ‘हार्डवेयर पसल दिउँसो ४ बजेपछि खोल्न दिने निर्णय गरेका छौं,’ काठमाडौंका प्रजिअ पराजुलीले भने ।
