बैशाख ३० गते हुने स्थानीय तहको निर्वाचन शान्तिपूर्ण रूपमा सम्पन्न गर्नको लागि सरकारले भएको प्रहरी जनशक्तिले नपुग्ने भन्दै म्यादी प्रहरीमा जागिर खुलाएपछि जिल्लामा आवश्यक संख्या भन्दा बढी दरखास्त परेको छ ।
बागलुङ जिल्लामा निर्वाचन सम्पन्न गर्नको लागि ८३४ जना म्यादी प्रहरीको आवश्यक परेको बिज्ञापन सार्वजनिक गरेकोमा १ हजार ९ सय ५३ जनाले आवेदन दिएका हुन् ।
म्यादी प्रहरीको लागि १ हजार ९ सय ५३ जनाको आवेदन परेको मध्ये १ हजार ६ सय ५५ पुरूष र २ सय ९८ जना महिलाको दरखास्त परेको को जिल्ला प्रहरी कार्यालय बागलुङका प्रहरी उपरीक्षक दयानिधी ज्ञावलीले बताउनुभयो ।
म्यादी प्रहरीको लागि आवेदन दिएका सबैको लिखित परिक्षा ,शारीरिक परिक्षण लगायतका प्रक्रिया पूरा गरे पश्चात ८३४ जना छनौट गरिने भएको छ । आवेदनहरुबाट योग्य व्यक्ति छानेपछि एक साता तालिम दिइनेछ । त्यसपछि उनीहरुलाई काममा खटाइनेछ । म्यादी प्रहरी भर्ना, छनौट र नियुक्तिका लागि प्रहरीबाट निर्धारित पाठ्यक्रम अनुसार स्वास्थ्य परीक्षण, लिखित परीक्षा, प्रयोगात्मक र अन्तर्वार्ता परीक्षा विधि अपनाउने मापदण्डमा उल्लेख छ ।
मापदण्डमा उल्लेख भएअनुसार म्यादी प्रहरीले प्रहरी जवानको सरह सुविधा पाउनेछन् । झण्डै डेढ महिनाको लागि भर्ना गरिने म्यादी प्रहरीमा राम्रो पारिश्रमीक भएको कारणले पनि बेरोजगार युवाहरू आकर्षित भएको देखिन्छ ।
