बागलुङका शिक्षासेवी सूर्य प्रसाद श्रेष्ठ ‘मिलन’ को स्मृतिमा बागलुङको विद्यालय विद्यामन्दिर माध्यमिक विद्यालयमा ६० थान प्लास्टिक कुर्ची हस्तान्ण गरिएको छ । धौलागिरि अंचलकै पुरानो विद्यालय विद्यामन्दिर माध्यमिक विद्यालयका पूर्वशिक्षक रहेका श्रेष्ठको सहयोगमा निर्माण भएको मिलन गुरु विज्ञान प्रयोगशालाको लागि ६० थान प्लास्टिक कुर्ची हस्तान्त्रण गरिएको हो ।
श्रेष्ठका छोरा सिद्धार्थ मिलन श्रेष्ठ बुहारी शर्मिला श्रेष्ठ र छोरी सलोनी श्रेष्ठले विद्यालय व्यवस्थापन समितिका अध्यक्ष वावुलाल शाक्यलाई कुर्ची हस्तान्त्रण गर्नु भएको थियो । विद्यालयका पूर्वशिक्षक तथा संस्कृतिकर्मी रहेको श्रेष्ठको १६ लाख ६५हजार ५सय ५५ रुपैया सहयोगमा मिलन गुरु विज्ञान प्रयोगशाला निर्माण गरिएको थियो । श्रेष्ठले लामो समय विद्यालयमा स्वास्थ्य विषय पढाएका थिए । ‘मिलन’ उपनामले परिचित श्रेष्ठमा चित्रकला,नाटक र रोपाइ नाचमा विशेष दखल थियो । श्रेष्ठले बास्सा नाचका कलाकारहरुलाई सृंगार गर्ने कार्यमा महत्वपूर्ण भूमिका निर्वाह गरेका थिए ।
विद्यामन्दिर माध्यामिक विद्यालयबाट विसं २०१६ सालमा पाल्पाबाट एसएलसि दिने श्रेष्ठ पहिलो पुस्ताका विद्यार्थी थिए । श्रेष्ठले विद्यामन्दिर माध्यमिक विद्यालयको नयाँ भवन निर्माणको लागि १३ लाख ५० हजार प्रदान गरी एउटा सुविधा सम्पन्न कोठा निर्माण गर्नुको साथै विज्ञान प्रयोगशाला बनाउनको लागि ३ लाख रुपैयाँ प्रदान गरेका थिए ।
विं.सं.१९९७ मा राणाशासनको समयमा ओमप्रसाद गौचन, मेघकुमार वैद्यले स्थापना गरेको विद्यामन्दिर साविक नेपालमा खुलेको विद्यालय मध्य इतिहास बोकेको पुरानो विद्यालय हो । २०७२ सालको भूकम्पले क्षति पुगेको विद्यालयमा धनधान्याचल महायज्ञबाट रकम जुटाई अहिले सुविधासम्पन्न भवन बनाइएको छ ।
महायज्ञमा करिब ७ करोड रकम संकलन भएको थियो । त्यसमध्ये करिब पाँच करोड रुपैयाँ पूर्वविद्यार्थीहरूको योगदान रहेको छ । अहिले पनि विभिन्न दाताहरुको सहयोग आइरहेको विद्यालय व्यवस्थापन समितिका अध्यक्ष वावुलाल शाक्यले बताउनु भयो ।
