बागलुङ । बागलुङ नगरपालिका–४ नम्बर वडालाई बिहीबार बालमैत्री वडा घोषणा गरिएको छ ।आगामी पुस मसान्तभित्र नगरलाई नै बालमैत्री घोषणा गर्ने लक्ष्य राखेको बागलुङ नगरपालिकाले वडालाई बालमैत्री घोषणा गर्न बुधबारदेखि थालेको हो ।
बागलुङ नगरपालिका–१४ नारायणस्थानलाई पहिलो बालमैत्री वडाको रुपमा घोषणा बुधबार गरेको बागलुङ नगरपालिकाले बिहीबार बानपा–४ लाई दोस्रो बालमैत्री वडा घोषणा गरेको हो ।
गण्डकी प्रदेश सभाका सदस्य जित शेरचनको प्रमुख आतिथ्यतामा वडालाई बालमैत्री घोषणा गरिएको हो । बालमैत्री वडा घोषणपछि बोल्दै शेरचनले बालबालिकाको विकासनै पहिलो विकास रहेको बताउनुभयो ।
शेरचनले बालमैत्री सुशासन युक्त नगर घोषणा अन्तर्गत वडाले सबै सूचक पुरा गरेकोमा धन्यवाद व्यक्त गर्नुभयो । नेपाललाई बालमैत्री बनाउनका लागि बागलुङ नगरपालिका अघि सरेर सकरात्मक शन्देस दिएको बताउनुभयो ।
बालमैत्री नगर अभियानले सर्थकता दिएर नगरकै पहिचान बढाएको शेरचनको भनाई छ । शेरचनले बाल संरक्षण, बाल विकास, बाल बचाउ जस्ता ५१ सूचक पुरा गरी वडालाई बालमैत्री घोषणा गरिएको घोषणापत्र प्रस्तुत गर्नुभएको थियो ।
कार्यक्रममा कार्यवहाक नगरप्रमुख राजु खड्काले बालमैत्री नगरपालिका निर्माणको अभियानले सार्थकता पाउन थालेको बताउदै दिगोपनाका लागि नगरपालिका झनै अग्रसरता भएर लाग्ने बताउनुभयो । उहाँले बालमैत्री घोषणा भएपछि समेत नगरपालिकाले दिगोपनाको काममा करोडौ खर्च गर्नका लागि रणनैतिक योजना तयार पारेको बताउनुभयो ।
उहाँले बालमैत्री नगर अभियानले बालबालिको चौतर्फी विकासमा सहयोग पु¥याउने जानकारी दिनुभयो ।
आगामी पुस मसान्तभित्र सबै वडा घोषणा गरि सकेर नगरस्तरीय कार्यक्रम गर्ने बताउदै अन्य वडाहरु क्रमश बालमैत्री वडा घोषणाको चरणमा रहेको बताउनुभयो ।
जिल्ला स्तरीय अनुगमन टोलीले वडामा पुगेर सबै सूचकबारे अध्ययन गरेपछि जिल्ला समन्वय समितिको अनुमतिमा वडालाई बालमैत्री घोषणा गरिएको बालमैत्री सहजकर्ता देवु खड्का सापकोटाले जानकारी दिनुभयो ।
कार्यक्रममा निमित्त प्रमुख प्रशासकीय अधिकृत धनप्रसाद पोखरेलले बालमैत्री अभियान अभियान अभियानमात्रै नभएर बालबालिकाको दिगो विकास भएको जानकारी दिनुभयो ।
कार्यक्रममा कार्यपालिका सदस्य तथा बालमैत्री फोकल पर्सन ज्योति विष्टले बालमैत्री अभियानको प्रतिवेदन प्रस्तुत गर्नुभएको थियो ।
कार्यक्रममा प्रमुख जिल्ला अधिकारी नेत्र प्रसाद सुवेदी, वडा अध्यक्ष तथा सामाजिक विकास समितिका संयोजक ज्ञानेन्द्र गौतम, नेपाल रेडक्रस सोसाईटीका बागलुङका सभापति जग्गन्नाथ आचार्य, कुडुले मावि व्यवस्थापन समितिका अध्यक्ष कृष्ण प्रसाद आचार्य, धौलागिरि बोडिङ स्कुलका प्रिन्सिपल गणेस पौडेल र बाल सञ्जालका अध्यक्ष निलकण्ठ पौडेल लगायतले मन्तव्य व्यक्त गर्नुभएको थियो ।
कार्यक्रम बागलुङ नगरपालिका-४ का वडा अध्यक्ष कुमार विक्रम क्षेत्रीको अध्यक्षता, वडा सदस्य अर्जुन सापकोटाको सञ्चालन तथा बालमैत्री वडा सञ्जालको सचिवले कामना श्रेष्ठको स्वागतमा सम्पन्न भएको थियो ।
एक वर्षभरी वडाको सबै टोल, विद्यालय र समुदायमा पुगेर बालमैत्री अभियानको औचित्यबारे जानकारी गराएको, टोल टोलमै बाल क्लब गठन गरिएको, बालमैत्री पूर्वाधार निर्माण गरेको सहजकर्ता सापकोटाले बताउनुभयो ।
तस्बिर:दिनेश जिसी
