बागलुङ । नेपाली कम्युनिष्ट पार्टीका केन्द्रीय नेता एवं पूर्वमन्त्री पम्फा भुसालले भदौ २४ गतेको घटना आन्दोलन नभएर प्रतिक्रान्ति भएको बताएकी छिन् । अभिव्यक्ति स्वतन्त्रता र शासकीय अव्यवस्थविरुद्ध गत भदौ २३ को राजनैतिक आन्दोलन भएपनि देशको राष्ट्रिय सम्पत्ती र उद्योग व्यवसायको क्षेत्रमा गम्भीर क्षती पुग्ने गरी भएको भदौ २४ को घटना जेनजी पुस्ताले नगरेको भुसालले बताइन् ।
उनले प्रतिनिधिसभा सदस्य निर्वाचन तोकिएकै मितिमा हुनुपर्ने बताएकी छिन् । प्रेस सेन्टर नेपाल, बागलुङले शनिबार बागलुङमा आयोजना गरेको पत्रकार भेटघाटमा उनले संविधान र लोकतन्त्रको रक्षाका लागि निर्वाचनको विकल्प नभएको उल्लेख गरिन् ।
“फागुन २१ मै निर्वाचन हुनुपर्छ, संविधानलाई सही ट्रयाकमा ल्याउन र व्यवस्थाको रक्षाका लागि निर्वाचनको विकल्प छैन”, उनले भनिन्, “जेन्जी आन्दोलनपछि सरकार निर्माणका क्रममा संविधान केही मिचिएकाले त्यसलाई सच्चाउन पनि निर्वाचन अपरिहार्य छ ।” उनले वर्तमान सरकार आवश्यकताको सिद्धान्तका आधारमा बनेको धारणा राखिन् ।
तत्कालीन नेकपा (माओवादी केन्द्र)का उपाध्यक्षसमेत रहेकी नेता भुसालले आगामी निर्वाचनमा नेपाली कम्युनिष्ट पार्टीले ५० प्रतिशत युवालाई उम्मेदवार बनाउने बताइन् । उनले ‘जेनजी’ आन्दोलनको माग अनुसार पार्टीमा पनि युवा सहभागितालाई बढाउने उल्लेख गरिन् ।
‘जेनजी’ आन्दोलनमा उठेका माग आफूहरुले विगतदेखि नै उठाउँदै आएको बताउँदै उनले ती मागको सम्बोधन हुनुपर्ने विचार राखिन् । नेपाली कम्युनिष्ट पार्टीलाई देशकै सबैभन्दा ठूलो कम्युनिष्ट पार्टीका रुपमा स्थापित गरिने उनको भनाइ छ ।
“अहिले भएको एकताले मात्र पुग्दैन, अन्य वामपन्थी दल र घटकहरुबीच पनि एकता गर्दै देशमा एउटा मात्र क्रान्तिकारी कम्युनिष्ट पार्टी बनाउनुपर्छ”, उनले भनिन्, “परिवर्तनको रक्षासँगै राष्ट्रिय एकता र स्वाधिनतालाई सुदृढ गर्न विभिन्न कम्युनिष्ट घटकहरुबीच एकता गरेर नेपाली कम्युनिष्ट पार्टी बनेको हो ।”
नेता भुसालले आगामी फागनु २१ गते हुने प्रतिनिधिसभा निर्वाचनमा नेपाल कम्युनिष्ट पार्टीले एक्लै प्रतिस्पर्धामा उत्रने बताइन् ।
