बागलुङ । नेकपा गलकोट नगर समितिले रसुवाको भोटेकोशीमा आएको बाढीबाट प्रभावित नागरिक तथा परिवारको उद्धार, राहत र पुनर्स्थापनाका लागि ५१ हजार रुपैयाँ आर्थिक सहयोग गरेको छ ।
बाढीका कारण रसुवा, नुवाकोट र धादिङलगायत जिल्लामा ठूलो जनधनको क्षति भएपछि नेकपा गलकोट नगर समितिले पार्टीको केन्द्रीय समितिले स्थापना गरेको दैवीप्रकोप उद्धार कोषमा उक्त रकम जम्मा गरेको हो ।
नेकपाका केन्द्रीय सदस्य तथा नगर इन्चार्ज हर्क थापाले प्राकृतिक विपत्तिबाट प्रभावित नागरिकको उद्धार, राहत तथा पुनर्स्थापनामा सहयोग पुगोस् भन्ने उद्देश्यले सामाजिक उत्तरदायित्वअन्तर्गत आर्थिक सहयोग गरिएको बताउनुभयो ।
बैठकमा नेकपाका केन्द्रीय सदस्य तथा जिल्ला सहइन्चार्ज ज्ञामनाथ गैरे ‘अनिल’ले प्राकृतिक विपत्तिका कारण ठूलो जनधनको क्षति भएको संकटपूर्ण अवस्थामा राहत तथा पुनर्स्थापनाका लागि सबै पक्ष एकजुट हुनुपर्ने बताउनुभयो ।
बैठकले बाढीपीडितका लागि थप राहत संकलन गर्ने, पार्टी सदस्यता नवीकरण गर्ने तथा वडा अधिवेशन गर्ने निर्णयसमेत गरेको छ ।
बैठकमा नेकपा केन्द्रीय सदस्य तथा जिल्ला सहइन्चार्ज फमलाल निउरे, केन्द्रीय सदस्य तथा जिल्ला सहइन्चार्ज ज्ञामनाथ गैरे ‘अनिल’, जिल्ला संयोजक प्रकाश घर्ती र केन्द्रीय सदस्य तथा नगर इन्चार्ज हर्क थापाले मन्तव्य व्यक्त गर्नुभएको थियो ।
बैठक नगर समितिका अध्यक्ष गंगा भुजेलको अध्यक्षतामा सम्पन्न भएको थियो ।
गत १० भदौमा चीनको तिब्बततर्फबाट आएको विनाशकारी बाढीका कारण भोटेकोशी र त्रिशूली नदी किनारका बस्ती प्रभावित भएका थिए ।
बाढीबाट रसुवासहित नुवाकोट र धादिङमा ठूलो जनधनको क्षति भएको छ ।
बाढीपीडितको राहत तथा पुनर्स्थापनाका लागि सर्वसाधारण, शिक्षक, कर्मचारी, उद्योगी–व्यवसायी, संघ–संस्था तथा विभिन्न दाताले सहयोग गर्दै आएका छन् ।
