बागलुङ । नेपाली कांग्रेसको १५औँ महाधिवेशनअन्तर्गत बागलुङ क्षेत्र नं १ को क्षेत्रीय अधिवेशनमा सहमति जुट्न नसकेपछि निर्वाचन प्रक्रिया अघि बढाइए पनि विभाजनको रेखा कोरिएको छ ।
क्षेत्रीय सभापतिमा उम्मेदवारी दिएका नारायणप्रसाद श्रेष्ठ समूह सहमति निर्माणको प्रक्रियाप्रति असहमति जनाउँदै अधिवेशन प्रक्रियाबाट बाहिरिएपछि निर्वाचनको अवस्था सिर्जना भएको हो।
श्रेष्ठले विज्ञप्ति जारी गर्दै सहमतिको नाममा एकलौटी ढंगले क्षेत्रीय समिति, प्रदेश समिति, प्रदेश महाधिवेशन प्रतिनिधि र केन्द्रीय महाधिवेशन प्रतिनिधि चयन गर्न खोजिएको भन्दै असहमति जनाएको बताइएको छ। श्रेष्ठ समूहका अनुसार सहमतिको प्रक्रियामा सहभागी करिब उम्मेदवारी दिएका ६० जना प्रतिनिधि बाहिरिएपछि सर्वसम्मत समिति तथा प्रतिनिधि चयनको प्रक्रिया प्रभावित भएको हो।
यसअघि क्षेत्रीय सभापतिमा खडक थापा, सचिवमा तेजप्रसाद शर्मा, सहसचिव (महिला) मा पूर्णमाया सुनार र सहसचिव (खुला) मा दुर्गाबहादुर बोहरा सर्वसम्मत निर्वाचित भएको मतदान अधिकृत शालिग्राम भट्टराईले जानकारी दिनुभयो।
तर, बाँकी पदमा सहमति कायम हुन नसकेपछि निर्वाचन प्रक्रिया अघि बढाइएको क्षेत्रीय सभापति थापाले बताउनुभयो। उहाँका अनुसार सर्वसम्मतिका लागि प्रयास भए पनि सहमति जुट्न नसकेपछि निर्वाचनमा जानुपरेको हो।
बागलुङ नगरपालिका–२ स्थित ब्राउन आइज पार्टी प्यालेसमा अहिले मतदान भइरहेको छ।
केन्द्रीय महाधिवेशन प्रतिनिधितर्फ खुला महिला चार पदका लागि पाँच जना, युवा खुलातर्फ दुई पदका लागि चार जना र दलित समावेशीतर्फ एक पदका लागि दुई जनाबीच प्रतिस्पर्धा भइरहेको छ। त्यस्तै, गण्डकी प्रदेश महाधिवेशन प्रतिनिधितर्फ खुला आठ पदका लागि १० जना उम्मेदवारबीच मतदान भइरहेको छ।
नेपाली कांग्रेसको विधानअनुसार क्षेत्रीय अधिवेशनले सभापतिसहित २३ सदस्यीय क्षेत्रीय कार्यसमिति निर्वाचित गर्ने व्यवस्था छ। निर्वाचित कार्यसमितिले थप ६ जना सदस्य मनोनित गर्ने प्रावधानसमेत रहेको छ।
यस क्षेत्रीय अधिवेशनबाट ३३ जना केन्द्रीय महाधिवेशन प्रतिनिधि तथा गण्डकी प्रदेशका ‘क’ र ‘ख’ क्षेत्रका लागि आवश्यक २२ जना प्रदेश महाधिवेशन प्रतिनिधि चयन गर्नुपर्नेछ।
पार्टीको १५औँ महाधिवेशन र ०८४ को स्थानीय निर्वाचन नजिकिँदै गर्दा बागलुङ क्षेत्र नं १ मा सहमति प्रयास असफल भई निर्वाचनमा पुगेको घटनाले कांग्रेसभित्रको आन्तरिक कलहलाई थप सतहमा ल्याएको छ। यसको प्रभाव आगामी महाधिवेशन प्रक्रिया तथा जिल्लाको राजनीतिक र सांगठनिक गतिविधिमा पर्न सक्ने देखिएको छ।
