छैन मेरो शरीरमा अत्तरको सुगन्ध, होला बरु जिउभरि पसिनाको गन्ध
होला मेरो खुट्टा बरु पटपटी फुटेको तर मेरो जिन्दगी यसैमा उठेको
चाहिँदैन मलाई सिसाको महल, चाहिँदैन मलाई सम्पत्तिको रास ।
जीवन शर्माले सधैं सर्वहारा जनताको मुक्तिका गीत गाए । आफ्नो स्वरलहरीमार्फत उनीहरूका पक्षमा वकालत गरिरहे । यति बेला उनै शर्मा सर्वहारा हुनुको तीतो यथार्थ भोगिरहेका छन् । उनको परिवारमा वज्रपात भएझैं छ । उनी यसबाट उम्कने उपायको खोजीमा भौंतारिइरहेका छन् ।
दसैंका बेला उनको घरमा पनि रौनक थियो । परिवार हाँसीखुसी पर्व मनाइरहेका थिए । त्यही बेला खाना खाने क्रममा मासुको हड्डीले अन्ननली छेडेपछि जीवन–मरणको दोसाँधमा छन् उनका माइला छोरा अमृत । महाराजगन्जस्थित मनमोहन कार्डियो अस्पतालको शय्यामा हलचल गर्न नसक्ने अवस्थामा छन् ।
गायक शर्मा चिन्तामा छन्– छोराको उपचारमा कहाँबाट रकम जुटाउने ? उनी मृत्युसँग संघर्ष गरिरहेका छोराको अनुहार हेर्छन् अनि अस्पतालको ढोकामा आएर एक्लै रुन्छन् । छोरालाई बचाउनुपर्ने एउटा बाबुको दायित्व, कर्तव्य सम्झँदै गम्भीर बन्छन् । डाक्टरको कुराले कहिले तर्सिन्छन् अनि उपचार खर्च नजुट्ला भनेर झस्किन्छन् । पछिल्लो दिन उनको दिनचर्या नै यही हो ।
‘अमृतलाई बचाउन निकै गाह्रो भएको डाक्टरले सुनाउँदा म होसमा थिइनँ । तर डाक्टरको अथक प्रयासले जीवनमा थोरै भए पनि आशा पालएको छ । आशा पलाएपनि बीचमै निभ्ने हो कि भन्ने चिन्ता छ,’ शर्माले भने ।
मनमोहन कार्डियोका डा. रञ्जन सापकोटा नेतृत्वको टोलीले अमृतको नौ घण्टा लगाएर अप्रेसन गरेपछि तत्कालको खतरा टरेको छ ।
यसपछिको अप्रेसनका लागि ठूलो रकम चाहिने भएपछि शर्मा थप चिन्तामा छन् । देशका ठूला नेताहरूसँग पनि उनको चिनजान छ । तर अहिलेसम्म कहीँकतैबाट सहयोग नजुटेको उनले सुनाए ।
त्यसो त अमृतको उपचारका लागि नेकपाका केही नेताले पनि सहयोगका आग्रह गरिदिएका छन् । नेकपा स्थायी कमिटी सदस्य देवेन्द्र पौडेल अस्पतालमै पुगेर सबैलाई सहयोग गर्न अनुरोध गरेका थिए । नेकपा सांसद शान्ता चौधरीले पनि अस्पतालमै पुगेर सहयोगको अपिल गरेकी छन् ।
जनगायक शर्मालाई सहयोगको हात बढाउन चाहनेहरूले उनका दाइको नाममा रहेको निम्न बैंक खातामा सहयोग पठाउन सक्नेछन् ।
ग्लोबल आइएमई बैंक लिमिटेड
कान्तिपथ शाखा
अर्जुन आचार्य
खाता नम्बर ०१०७०१००४६७८७