लामो समयदेखि बन्द उद्योग सञ्चालन गर्न सरकारले तयारी अघि बढाएको छ। उद्योग वाणिज्य तथा आपूर्ति मन्त्रालयले सरकारी लगानीका रुग्ण उद्योग सञ्चालन गर्न लागेको हो ।
यस्ता उद्योग सार्वजनिक निजी साझेदारी पीपीपी मोडेलमा निजी क्षेत्रलाई सञ्चालन गर्न दिन मन्त्रालयले सरोकारवाला निकायसँग छलफल गरिरहेको छ ।
यसका लागि आवश्यक कानुनी प्रक्रियासँगै सम्बद्ध विषयमा हालै विभिन्न विषयविज्ञसँग छलफल भएको छ। छलफलमा मन्त्री लेखराज भट्ट, राज्यमन्त्री मोतीलाल दुगड सचिवहरू चन्द्र घिमिरे, वैकुण्ठ अर्याल र पूर्वसचिव विमल कोइरालालगायत सहभागी थिए । विषयविज्ञहरूले पीपीपी मोडेल नै उपयुक्त भएको सुझाव दिएको राज्यमन्त्री दुगडले बताए।
‘बन्द उद्योग पुनः सञ्चालन गर्न हामीले पीपीपी मोडेल अघि सारेका छौं,’ उनले भने, ‘यसको कानुनी र व्यावसायिक पक्षमा अहिले छलफल भइरहेको छ।’
मन्त्रालयले गोरखकाली रबर उद्योग, हेटौंडा कपडा उद्योग, बुटवल धागो कारखाना, ओरेन्टियल म्याग्नेसाइट, वीरगन्ज चिनी कारखाना र जनकपुर चुरोट कारखानालगायतलाई पीपीपी मोडेलमा चलाउन दिने तयारी गरेको जानकारी उनले दिए।
