घर घरमा माओवादी, जन जनमा माओवादी भन्ने मुल नाराका साथ नेपाल कम्युनिष्ट पार्टी माओवादी केन्द्र पर्वतले तीन महिने विशेष रुपान्तरण अभियान शुरु गर्ने भएको छ ।
शुक्रवार पर्वतको कुश्मा बजारमा भएको नेकपा माओवादी केन्द्र पर्वतको विस्तारित बैठकले केन्द्रीयले संचालन गरेको अभियानलाई प्रभावकारी बनाउने निर्णय गरेको हो ।
केन्द्रीय अभियानले पार्टीको सबैभन्दा तल्लो इकाइ वडा कमिटीलाई सुदृढ गर्न जनतासँग माओवादी विशेष रुपान्तरण अभियान सञ्चालन गर्न लागेको छ ।
त्यसको तयारीका लागि नेकपा माओवादी केन्द्र जिल्ला समन्वय समितिले अन्तरक्रिया गरेको छ । सो अवसरमा बोल्दै माओवादीका केन्द्रिय सदस्य हरि अधिकारीले सुशासन, आर्थिक समृद्धि र सामाजिक न्यायका लागि जनदवाव सिर्जनासँगै पार्टी शुद्धीकरण र सुदृढीकरण अभियान संचालन गरेको बताउनु भयो ।
अधिकारीले समाजवाद स्थापना गर्न माओवादीका सम्पुर्ण नेता र कार्यकर्ता लाग्नु पर्ने भन्दै संगठन सुदृढीकरण गर्दै एकताबद्ध भएर अघि बढेमा फेरि पनि देशको नेतृत्व माओवादीले लिन सक्ने बताउनु भएको थियो ।
कार्यक्रममा पर्वत जिल्ला इन्चार्ज बलावती शर्मा, म्याग्दी जिल्ला इन्चार्ज गुप्त बहादुर हमाल लगाएतले सरकारले लिएको सुशासन, समृद्धि र सामाजिक न्याय प्रदान गर्ने अभियान रहेको भन्दै सरकारले लिएको सकारात्मक कामको प्रचार गर्ने बताए ।
पालिका स्तरमा पार्टीको अवस्था बारेमा सात वटै स्थानीय तहका पार्टी प्रतिनिधिले रिपोर्टिङ गर्नुभएको थियो । सत्ता प्राप्तिका लागि केन्द्रित हुंदा पार्टी संगठन धरासयी भएको भन्दै केन्द्रिय समितिमा व्यापक आलोचना भएपछि माओवादीले अभियान सञ्चालन गर्ने भएको हो ।
३ महिना चल्ने र अभियानमा ६ जना केन्द्रिय सदस्य तथा १ प्रदेश उपाध्यक्ष गरि ७ जनालाई ७ स्थानिय तहमा पार्टीले खटाएको छ । जिम्मेवारी लिएर आएका नेताहरु ३ महिना सम्म वडा तथा टोलमा पुगेर काम गर्ने माओवादी केन्द्रका गण्डकी प्रदेश सदस्य नेता लोकराज आचार्यले जानकारी दिनु भयो ।
कार्यक्रम नेकपा माओवादी केन्द्र जिल्ला समन्वय समिति पर्वतका संयोजक मनरुपा सुवेदीको अध्यक्षतामा सम्पन्न भएको थियो। नेकपा माओवादी केन्द्रले देश भर तीन महिने पार्टी रुपान्तरण अभियान सञ्चालन गर्ने भएको छ । माओवादी केन्द्रको केन्द्रीय कमिटीको बैठकले जनतासँग माओवादी विशेष रुपान्तरण अभियान भदौ १६ देखि मंसिर १५ सम्म सञ्चालन गर्ने निर्णय गरेको थियो ।
