प्रधानमन्त्री केपी शर्मा ओलीलाई प्रतिगामी भनेर सडक आन्दोलनमा उत्रिएका माधव नेपाल वैशाख ३० गते सञ्चार–उद्यमी रामेश्वर थापाको घरमा भएको चार घण्टा लामो वार्तापछि एकाएक यू–टर्न भएका छन् । ओलीसँग मौखिक सहमति भएपछि नेपालले भन्दै आएको प्रतिगमन यति बेला सच्चिन पुगेको हो ?
नेपाललगायत चार जना नेतामाथि एमालेले गरेको कारबाही फुकुवा मात्रै भएको छ अहिले । यसलाई नै नेपाल समूहले आफ्नो ठूलो जित भएको महसुस गरेको देखियो । हुन पनि नेपाल समूहको खासै राजनीतिक एजेन्डा नै थिएन भन्ने कुरा अहिले आएर स्पष्ट भएको छ ।
आफ्ना केही मान्छेलाई राजनीतिक नियुक्ति, केही भागबन्डा, केही नेतालाई मन्त्री, अहिलेको सहमति यही नै देखियो ।
अहिले कोरोनाको नयाँ भेरिएन्ट समुदाय स्तरमा फैलिएको छ । दैनिकजसो सयौं नेपाली अस्पतालको बेडमा राम्रो उपचार नपाएर मृत्यु वरण गरिरहेका छन् । एक सिलिन्डर अक्सिजन पाउनु भनेको सञ्जीवनी बुटी पाउनुजत्तिकै महत्त्वपूर्ण हुन थालेको छ ।
यस्तोमा हजारौं–हजारको जुलुस निकालेर प्रतिगमन सच्याउन भनी लागेका नेपालले रातारात ओलीसँग उधारो चेक हातमा लिएसँगै आफूलाई साथ दिँदै आएका नेकपा माओवादी केन्द्रका अध्यक्ष प्रचण्डलाई समेत जिल्याइदिएका छन् ।
माओवादी अध्यक्ष प्रचण्डले नेपाल र ओलीबीचको सहमतिपछि आक्रोश पोखे । ‘उहाँ सुरुदेखि नै एमालेभित्रै गएर झगडा गरेको भए सबैले आफ्नो सुर गरिसकेका हुन्थे । कांग्रेसमा देउवा र पौडेल झगडा गरेजस्तै गरेको भए त्यो राम्रो हुन्थ्यो,’ उनले भने ।
शुक्रबारको भेटसमेत कुनै नेताको घरमा भएको भए त्यसले सकारात्मक सन्देश जान्थ्यो । तर व्यापारीको घरमा बस्नुले यिनलाई मिलाउने पनि बिचौलिया हुन् भन्ने प्रस्ट देखिएको छ । फेरि पनि दलाल पुँजीवाद हाबी भएको भन्दै दाहालले घटनाको विश्लेषण गरेका छन् ।
साँच्चै राजनीतिमा इमानदारी सबैभन्दा प्रमुख कुरा हो । यति बेला माधव नेपालमा न राजनीति देखियो न त इमानदारी । केही कुरा मोलतोल अनि केही थान मन्त्री आफ्नो गुटलाई लिएर पुग्ने भए त्यत्रो नटङ्की केका लागि ? त्यो जरुरी नै थिएन ।
न हुँदाखाँदाको दुई तिहाइको सरकार ढल्ने थियोे न त पार्टी कोल्याप्स हुने थियोे । साँच्चै नेकपा बनेपछि सबैभन्दा छटपटी माधव नेपाललाई भएको रहेछ भन्ने कुरा अहिलेसम्मको राजनीतिक घटनाक्रमले पुष्टि गरिसकेको छ ।
ओलीले प्रधानमन्त्रीका लागि मागेको विश्वासको मतदानमा उपस्थित नभएर पदको बार्गेनिङ गर्ने अनि दुई दिनमा ओलीकै निरन्तरता स्विकार्ने । साँच्चिकै प्रतिगमनविरुद्व आन्दोलन ! गजब छ राजनीति !
सारा विश्व कोरोना भाइरससँग लडिरहेका बेला नेकपाभित्रको गुटको राजनीति केन्द्र हुँदै सडकमा छरपस्ट रूपमा आएको कुरा राजनीतिमा सामान्य रुचि राख्ने जो–कोहीलाई थाहा भएकै विषय हो ।
नेपाल कम्युनिस्ट पार्टी एमाले र नेकपा माओवादी केन्द्रबीच पार्टी एकता भई नेकपा बनेपछि देशमा मात्रै नभएर अन्तर्राष्ट्रिय स्तरमा समेत ठूलो तरंग आएको थियो ।
देशमा दुई विपरीत ध्रुवका कम्युनिस्ट पार्टीको संयुक्त मोर्चा बनेको मात्र होइन, पार्टी एकता गरेर माओवादी केन्द्रका अध्यक्ष प्रचण्ड र एमाले अध्यक्ष केपी शर्मा ओलीले सारा दुनियाँलाई चकित पारेको धेरैलाई मन परेको थिएन ।
बाहिर सामान्य कार्यकर्तादेखि कम्युनिस्ट शक्तिलाई मन पराउने सबै खुसी भएका थिए । कतिपय सैद्धान्तिक कुरामा असहमति भए पनि दुईतिरका पार्टीका नेता–कार्यकर्ता एकजुट भएर गइरहेका थिए ।
देशमा झन्डै–झन्डै दुई तिहाइको सरकार चलिरहेको थियो । नेकपाभित्र दुई अध्यक्ष प्रचण्ड र ओलीले नेतृत्व गरेर अगाडि बढिरहेका थिए । सबै कुरामा तुषारापात गर्दै नाटक–नौटङ्की गरेर प्रचण्डलाई ओलीको खिलाफमा उतार्ने माधव नेपालको खेल वैशाख ३० गते आउँदा पर्दाफास भएको छ ।
बाँकी रह्यो उधारो सहमति, त्यो त कसरी पालना हुन्छ, कसरी लागू हुन्छ, भविष्यले बताउनेछ । अब सबै कुरा थाँती राखेर कोभिडविरुद्ध एकजुट भई यसलाई परास्त गर्ने संकल्पमा लाग्नु नै सबैभन्दा ठूलो बुद्धिमानी हुनेछ ।
