कांग्रेस नेता दोर्णकुमार कुँवरले केरोना संक्रमितको उपचार सहज बनाउन बुर्तिबाङ प्राथमिक स्वास्थ्य केन्द्रलाई स्वास्थ्य सामग्री हस्तान्तरण गरेका छन् । उनले व्यक्तिगत पहल र दाताहरूको सहयोगमा सामग्री जुटाएर केन्द्रलाई दिएका हुन् ।
कुँवर आफैं पनि संक्रमित भएका थिए । उनका अनुसार ढोरपाटन नगरपालिका–५ अधिकारीचौरका पूर्वन्यायाधीश दयानाथ खरेल तथा कोरिया र सिंगापुरमा रहेका असीम घर्ती, वीरबहादुर गुरुङलगायतले एक–एक थान वेड साइड मोनिटर दिएका छन् ।
त्यस्तै नेता कुमार कुँवरले व्यक्तिगत खर्चमा ७५ थान भिटिएम र ५० थान एन्टिजेनसहित चार लाख मूल्य बराबरको स्वास्थ्य सामग्री सहयोग गरेका छन् ।
ढोरपाटन–१ का वडाध्यक्ष तथा बुर्तिबाङ प्राथमिक स्वास्थ्य केन्द्र व्यवस्थापन समितिका अध्यक्ष चित्रबहादुर भण्डारी र स्वास्थ्यकर्मीको उपस्थितिमा कांग्रेस नेता कुँवर र नेता जित शेरचनले स्वास्थ्य केन्द्रलाई सामग्री हस्तान्तरण गरेका हुन् ।
त्यस क्रममा नेता कुँवरले केन्द्रका लागि अत्यावश्यक वेड साइड मोनिटर मेसिन उपलब्ध गराएको दाताहरूलाई धन्यवाद दिए ।
जनताको स्वास्थ्य अवस्थालाई मध्यनजर गरी विभिन्न सहयोगी दाताबाट र व्यक्तिगत खर्चमा स्वास्थ्य सामग्री जुटाई केन्द्रलाई सहयोग गरेको उनको भनाइ छ ।
कुँवरका अनुसार उनले व्यक्तिगत खर्चमै निसीखोला र ढोरपाटन नगरपालिकाका गरी १ सय ३१ जना नागरिकको पीसीआर परीक्षण गराइसकेका छन् ।
बागलुङ क्षेत्र नम्बर २ का ६ वटै पालिकामा गरी ६ सय थान भीटीएम किट पनि उपलब्ध गराएका छन् । ‘संक्रमण रोकथाम गर्न र बिरामीको सहज रूपमा उपचारका निम्ति सबैले सक्दो सहयोग गनुपर्छ,’ उनले भने ।
वडाध्यक्ष चित्रबहादुर भण्डारीले विषम परिस्थितिमा सबैले हातेमालो गरेर अघि बढ्नुपर्नेमा जोड दिए ।
