काठमाडौं–फोरजी सेवा विस्तार गर्न भन्दै नेपाल टेलिकमले अघि बढाएको टेन्डर आह्वान प्रक्रियाप्रति सत्तारुढ नेपाल कम्युनिष्ट पार्टी (नेकपा) कै सांसदहरुले असन्तुष्टि जनाएका छन् ।
आइतबार संघीय संसद, अर्थ समितिको बैठकमा बोल्दै सत्तारुढ नेकपाकी सांसद रामकुमारी झाँक्रीले ४ अर्बमै सकिने कामलाई २२ अर्ब खर्च गरेर सो सेवा विस्तार किन गर्नु प¥यो भनि सरकारलाई प्रश्न गरिन् ।
उनले नेपाल टेलिकमले फोरजी सेवाको नाममा ठूलै आर्थिक घोटाला गरेको आशंका गर्दै तत्काल छानवीन गर्न पनि सरकारसँग माग गरिन् ।
एनसेलले ४ अर्बमा सकेको सो कामलाई नेपाल टेलिकमले २२ अर्बवको बजेट इस्टिमेट गरेर ठूलै आर्थिक चलखेल गर्न खोजेको उनको आरोप छ ।
सत्तारुढ नेकपाकै अर्का सांसद मेटमणि चौंधरीले टेलिकमको फोरजी सेवा विस्तारसम्बन्धि परियोजनामा ठूलो आर्थिक चलखेल भएको हुन सक्ने आशंका व्यक्त गरे । उनले नेपाल टेलिकमले फोरजी सेवा विस्तारको नाममा आर्थिक अनियमितता गर्न खोजेको भन्दै आपत्ति पनि जनाए ।
सांसद चौंधरीले नेपाल टेलिकमको सो परियोजनालाई पारदर्शी ढंगले अघि बढाउन पनि सरकारलाई सचेत गराए ।
