गल्कोट नगरपालिका–६ चरौंदी स्थायी घर भई जापानको चिवा केनमा बस्दै आएकी मृगौलापीडित ४१ वर्षीया सीता उप्रेतीलाई गलकोट समाज जापानले आर्थिक सहयोग गरेको छ । समाजले उनलाई बुधबार कार्यक्रम आयोजना गरी २३ लाख रुपैयाँ उपलब्ध गराएको हो ।
श्रीमान् यमबहादुर उप्रेतीसँग बस्दै आएकी उनी केही वर्षयता दुवै मृगौलाले काम गर्न छोडेपछि चिवाकेनस्थित कासिवा कोउसेई सोउगोउ ब्योइनमा भर्ना भई डाइलसिसका भरमा बाँचिरहेकी छन् । पारिवारिक आर्थिक स्थिति साह्रै कमजोर भएको भन्दै उनले सहयोगका लागि गल्कोट समाजलाई निवेदन दिएकी थिइन् ।
समाजले जापानमा छरिएर रहेका गल्कोटेसहित अन्य नेपाली समुदायबीच आर्थिक संकलन अभियान चलाई जुटाएको रकम संस्थाका अध्यक्ष दिलु खत्री, सचिव नवीन न्युरेसहितको टोलीले पीडितलाई हस्तान्तरण गरेको हो ।
समाज अध्यक्ष खत्रीले उप्रेतीको कमजोर आर्थिक स्थितिका कारण मृगौला प्रत्यारोपण गर्न मुस्किल परेकाले आर्थिक अभियान चलाइएको बताए । यो रकम उप्रेतीको मृगौला प्रत्यारोपणसहित छोराछोरीको पठनपाठन तथा भविष्य निर्माणमा खर्च गरिने समाजका महासचिव कृष्ण केसीको भनाइ छ ।
