अमेरिकाका पूर्वराष्ट्रपति बाराक ओबामाले अमेरिकीसामु देशलाई गहिरोसँग विभाजित गर्ने सनकपूर्ण षड्यन्त्र सिद्धान्तहरूलाई उल्टाउनुपर्ने ठूलो जिम्मेवारी रहेको बताएका छन्।
बीबीसीसँगको अन्तर्वार्तामा उनले चार वर्षअघिको तुलनामा अमेरिका अझ गहिरोसँग विभाजित भएको बताए । चार वर्षअघि डोनल्ड ट्रम्प राष्ट्रपति चुनिएका थिए ।
ओबामाले सन् २०२० को अमेरिकी राष्ट्रपति चुनावमा जो बाइडनको विजय त्यस्ताखाले विभाजनहरू पुर्ने सुरुवात मात्र भएको बताए । उनले भने, ‘ती प्रवृत्तिहरूलाई उल्ट्याउन एउटा चुनावभन्दा धेरै समय लाग्नेछ ।’
ध्रुवीकरण भएको राष्ट्रसँग जुझ्न राजनीतिज्ञहरूको निर्णयलाई मात्र छाड्न नसकिने उनको तर्क छ । ओबामाले जो बाइडनसँग अहिलेको अवस्थामा एउटा राष्ट्रपतिसँग हुनुपर्ने सबै गुण भएको बताएका छन् ।
त्यसका लागि संरचनागत परिवर्तन र मानिसहरूले एकअर्कालाई सुन्नुपर्नेमा उनले जोड दिए । यद्यपि उनले आगामी पुस्ताको परिष्कृत सोचमा ठूलो आशा देखेको बताए ।
ओबामाले युवापुस्तालाई विश्वलाई परिवर्तन गर्न सक्ने सावधानीपूर्ण आशावादको सञ्चार गर्न र त्यो परिवर्तनको हिस्सा बन्न पनि आह्वान गरे । उनको नयाँ संस्मरणको प्रवर्धन गर्न बीबीसी आर्ट्सका लागि इतिहासकार डेभिड ओलुसोगाले लिएको अन्तर्वार्तामा ओबामाले अमेरिकामा विभाजन बढ्नुको कारण बताएका छन्।
उनका अनुसार ग्रामीण र सहरी अमेरिकाबीचको आक्रोश र अप्रसन्नता, आप्रवासन, अन्यायजस्तै असमानता र सनकपूर्ण षड्यन्त्र सिद्धान्तहरूजस्ता कुराले विभाजन बढाएको हो ।
उनले यस्ता कुरालाई केही अमेरिकी सञ्चारमाध्यमद्वारा प्रवर्धन गरिएको र सामाजिक सञ्जालद्वारा त्यसमा थप मलजल गर्ने काम भएको उल्लेख गरेका छन् ।
