नेपाली लोकबाजा संग्रहालयले नेपालमा सांगितिक पर्यटन प्रर्वद्धन गर्ने उद्देश्यले हरेक वर्ष आयोजना गर्दै आएको अन्तर्राष्ट्रिय लोक संगीत फिल्म महोत्सव यो वर्षको मंसिर १० देखि १३ गतेसम्म हुने भएको छ ।
‘जीवनको लागि संगीत र बाँच्नको लागि संगीत’ भन्ने नाराका साथ नेपाली लोक बाजा संग्रहालयले हरेक वर्ष मंसिर महिनामा अन्तर्राष्ट्रिय लोक संगीत फिल्म महोत्सव आयोजना गर्दै आएको छ । दशौं लोक संगीत चलचित्र महोत्सवमा विश्वका २४ वटा देशका २८ वटा फिल्म प्रदर्शन हुने नेपाली लोकवाजा संग्राहलयका संस्थापक रामप्रसाद कँडेलले जानकारी दिए ।
कँडेलका अनुसार अमूल्य र अमूर्त सम्पदा, लोकसंगीत, लोकबाजा लोकनाच, लोकसंस्कृति, लोकपरम्परा र लोक जीवनका विविध पक्षहरुको अध्ययन अनुसन्धान र प्रचार–प्रसार गर्न लोक संगीत फिल्म महोत्सवको मुख्य उद्देश्य रहेको छ । साथै विश्वका विभिन्न राष्ट्रहरुले आ–आफ्ना मौलिक लोक संस्कतिको अध्ययन अनुसन्धान र संरक्षणको लागि के–कस्ता कार्यहरु भइरहेका छन्, मौलिक संस्कृति संरक्षण गर्न के कस्ता कार्य गर्नु पर्ने रहेछ भन्ने अन्तराष्ट्रिय अनुभव आदान प्रदान गरिने भएको छ ।
यस वर्षको दशौं अन्तर्राष्ट्रिय लोक संगीत चलचित्र महोत्सव कोभिड –१९ को महामारीमा दिवंगत भएका सम्पूर्ण ज्ञात तथा अज्ञात संगीतकर्मीहरुको लोक संगीत प्रेम र जीवनभरको योगदानको सम्मान स्वरुप उनीहरुको नाममा सर्मपण गरिएको छ । मंसिर १० गतेको दिन साँझ त्रिपुरेश्वर महादेव मन्दिर, त्रिपुरेश्वरमा १०८ वटा दियो प्रज्वलन गरेर दिवंगत आत्माहरुको सम्मान गरिने भएको छ ।
दैनिक ११ः०० वजे देखि ४ः०० बजेसम्म दुई सो प्रर्दशन गरिने महोत्सवमा विभिन्न देशका लोक संगीत संस्कृति, जीवनशैली, सम्बन्धी वृत्तचित्रहरुले भाग लिएकोमा आमन्त्रित, अप्रतियोगी, र प्रंतियोगी गरी २४ वटा देशका २८ वृतचित्रहरुको प्रदर्शन गरिने भएको छ ।
