पुराना आइफोन ढिलो बनाइदिएको आरोप खेपेको एप्पल कम्पनीले उक्त विवाद टुग्याउन ११ करोड ३० लाख अमेरिकी डलर तिर्ने भएको छ ।
अमेरिकाका ३३ राज्यले प्रयोगकर्ताहरूलाई नयाँ आइफोन किन्न बाध्य पार्न एप्पल कम्पनीले पुराना साधन सुस्त बनाइदिएको दाबी गरेका थिए ।
सन् २०१६ मा लाखौँ प्रयोगकर्ताले आइफोन सिक्स, सेभन र एसईमा समस्या खेपेका थिए । त्यसलाई ‘ब्याट्रीगेट’ को संज्ञा दिइएको थियो ।
एप्पलले यस विषयमा टिप्पणी गर्न अस्वीकार गरेको छ । यसअघि उसले पुरानो ब्याट्रीको आयु बढाउन फोन ढिलो पारिएको तर्क गरेको थियो ।
यसअघि गत मार्च महिनामा उसले एउटा छुट्टै मुद्दामा प्रभावित प्रयोगकर्ताहरूलाई ५० करोड डलरसम्म तिर्न सहमति गरेको थियो । सन् २०१६ मा एप्पलले आइफोन सिक्स, सेभन र एसई मोडलका सफ्टवेयर अद्यावधिक गरेको थियो । त्यसो गर्दा पुराना फोनहरूमा चिपको गति सुस्त भएको थियो ।
अनुसन्धाताहरूले सन् २०१७ मा अस्वाभाविक रूपमा आइफोनको गति घटेको पत्ता लगाएपछि एप्पलले सफ्टवेयर अद्यावधिक गर्दा त्यसो भएको स्वीकार गरेको थियो ।
विभिन्न अमेरिकी राज्यहरूले एप्पल कम्पनीले छलपूर्वक व्यवहार गरेको दाबी गर्दै उसले बरु ब्याट्र फेर्नुपर्ने वा समस्याबारे स्पष्ट रूपमा जानकारी दिनुपर्ने तर्क गरेका थिए ।
एरिजोना राज्यमा संकलित विवरणअनुसार दसौँ लाख आइफोन प्रयोगकर्ताहरू उक्त समस्याबाट प्रभावित भएका थिए । एप्पलले आर्थिक लाभका लागि फोन ढिलो पारिएको भन्ने आरोप खण्डन गर्ने गरेको छ । एरिजोनाको अदालतमा पेस गरिएको एउटा दस्तावेज बुधबार सार्वजनिक गरिएको छ ।
त्यसमा उक्त राज्यका महाधिवक्ताले लेखेका छन्, ‘धेरै उपभोक्ताले उपयोगी केवल एउटा उपाय एप्पलबाट नयाँ मोडलको आइफोन किन्नु हो भन्ने निधो गरे ।
एप्पललाई अवश्य पनि विक्रीवितरणमा त्यसको प्रभाव पर्छ भन्ने थाहा थियो । ’ सम्झौतामा एप्पलले आफूले कुनै अनुचित काम गरेको वा कानुन उल्लंघन गरेको स्वीकार गरेको छैन ।
उक्त विशाल प्रविधि कम्पनीले आईफोन पावर व्यवस्थापनबारे आगामी तीन वर्ष आफ्नो वेबसाइट, सफ्टवेयर अपडेट टिपोट र आइफोन सेटिङ्समा ‘सत्य सूचना’ दिने सहमति गरेको छ ।
विभिन्न आरोपको शृंखलापछि एप्पलले अहिले यस्तो सम्झौता गरेको हो । एप स्टोरमा आफ्नो प्रभुत्व भएकाले आईफोन निर्माता उक्त कम्पनीले विकासकर्ताहरूबाट अनुचित रूपमा पैसा लिने गरेको आरोप पनि लागेको छ । यसै विषयमा एपिक गेम्सले एप्पलविरुद्ध एउटा मुद्दा हालेको छ ।
