जापानले मानिसमा छिटो सर्ने नयाँ स्वरूपको कोरोना भाइरस आफ्नो देशमा आउन नदिन अन्य देशबाट जापान प्रवेशमा रोक लगाएको छ । यो नियम सोमबारदेखि लागु हुने र जनवरीको अन्त्यसम्म कायम रहने जनाइएको छ । विदेशमा रहेका जापानी नागरिक र जापानमा रहेका विदेशी नागरिकले भने सम्बन्धित देश जान सक्नेछन् ।
जापानबाट बेलायत भ्रमणमा गएका पाँच जना व्यक्ति नयाँ प्रजातिको कोरोनाबाट संक्रमित भएको पाइएको जापान सरकारले जनाएको छ । कम्तीमा तीन महिना जापानमा बस्ने मानिसलाई अक्टोबर महिनापछि जापानले प्रवेशको अनुमति दिएको थियो जसका लागि १४ दिनको क्वारेन्टिनको सर्त राखिएको थियो ।
नयाँ प्रजातिको कोरोना भेटिएपछि जापानले बिहीबार बेलायत र शुक्रबार दक्षिण अफ्रिकाबाट यात्रा प्रतिबन्धको सूचीमा राखेको थियो । लामो समयका लागि भिसा दिन भने अहिले रोकिरहेकै छ । विदेशबाट फर्किने सबै जापानीलाई १४ दिन क्वारेन्टिनमा बसिदिन सरकारले आग्रह गरेको छ ।
