बागलुङ ।राष्ट्रिय प्रजातन्त्र पार्टी (राप्रपा) को निर्देशक समिति अध्यक्षबाट डा प्रकाशचन्द्र लोहनीले राजीनामा दिएका छन् ।
राप्रपाका अध्यक्ष राजेन्द्र लिङदेनलाई सम्बोधन गर्दै लोहनीले आइतबार राजीनामा पत्र बुझाएका हुन् । उनले पार्टीले गत फागुण २१ गते सम्पन्न प्रतिनिधिसभा सदस्य निर्वाचनमा गम्भीर धक्का खाएपछि राजीनामा दिएका हुन् ।
डा. लोहनीले एक विज्ञप्ति जारी गर्दै पार्टीका जिम्मेवार पदाधिकारीले मार्गप्रशस्त गर्नुपर्ने र जनभावनाअनुरुप तदर्थ समिति गठन गरी महाधिवेशन गर्नुपर्ने बताएका छन् ।
आन्तरिक र अन्य विभिन्न कारणले निर्वाचनमा निराशाजनक नतिजा आएको उल्लेख गर्दै यो विशेष अवस्थामा उनले मूल नेतृत्वले जनभावना अनुसार अगाडि बढ्न आग्रह गरेका छन् ।
सुमधुर सम्बन्ध नभएको लिङ्देन र लोहनीबीच यस घटनाले सम्बन्ध अझ विग्रेन निश्चित छ ।
अध्यक्ष लिङ्देनले लोहनीलाई समानुपातिक सूचीमा राख्ने कि नराख्ने भनेर पार्टीमा चुनाव नै गराएका थिए। लोहनी पराजित भएपछि उनको नाम बन्द सूचीमा राखिएको थिएन।
