बागलुङमा रहेको इमेज बचत तथा ऋण सहकारी संस्थाको शनिबार होटल ब्राउन आईजमा ५ औँ साधारण सभा सम्पन्न भएको छ । साधारण सभा कार्यक्रममा संस्थाका अध्यक्ष देवकुमार नेपालीको अध्यक्षता, बागलुङ क्षेत्र नम्बर १ क का प्रदेश सभा सदस्य इन्द्रलाल सापकोटाको प्रमुख आतिथ्यता रहेको थियो ।
कार्यक्रममा उत्कृष्ट कारोबार गर्ने २८ जनालाई संथाले मायाको चिनो दिइ सम्मान गरेको हो । त्यस्तै प्रमुख अतिथि रहेको प्रदेश सभा सदस्य सापकोटालाई पनि दोसल्ला ओढाएर सम्मान गरिएको थियो ।
कार्यक्रममा बागलुङ उपभोक्ता मंचका अध्यक्ष शैलेन्द्रकुमार श्रेष्ठ, प्रमुख जिल्ला अधिकारी विष्णुबहादुर थापा, नेपाल पत्रकार महासंघ बागलुङका अध्यक्ष दिल शिरिष लगायतले मन्तव्य राखेका थिए ।
कार्यक्रमको सो अवसरमा इमेज बचत तथा ऋण सहकारी संस्थाका अध्यक्ष देवकुमार नेपालीले वार्षिक आय व्यय प्रस्तुत गरेका थिए । यस वर्ष २ करोड ८६ लाख ७ हजार ८४ रुपैया ६१ पैसा आम्दानी गरेको सहकारीको खर्च २ करोड ३० लाख ४९ हजार ७ सय ६९ रुपैया ९५ पैसा रहेको र १५ लाख ५७ हजार २ सय ६४ रुपैया ६६ पैसा मुनाफा गरेको छ ।
कार्यक्रममा संस्थाका अध्यक्ष देवकुमार नेपालीले पत्रकार महासंघ बागलुङको भवन निर्माणका लागि व्यक्तिगत तर्फदेखि १ लाख ११ हजार १ सय ११ रुपैया दिने घोषणा गरेका छन । कार्यक्रम संस्थाका सहल्लाकार धनबहादुर परियारको स्वागत र रेडियो बुर्तिबाङका पत्रकार योगेन्द्र विश्वकर्माको संचालनमा सम्पन्न भएको हो ।
