बागलुङ । वैधानिक शिकारका लागि प्रख्यात ढोरपाटन शिकार आरक्ष क्षेत्रमा वर्षको दोस्रो शिकार याम शुरु भएको छ ।
राष्ट्रिय निकुञ्ज तथा वन्यजन्तु संरक्षण विभागका अनुसार यो याममा दश नाउर र चार झारलको शिकार हुनेछ । बोलपत्र प्रक्रियाबाट छानिएका छ कम्पनीले पेशेवर विदेशी शिकारीलाई आरक्षमा शिकार गराउने छन् । बोलकबोलमा कम्पनीबीच भएको प्रतिस्पर्धाले यो याममा शिकारको दर पनि बढेको छ । एउटा नाउर शिकारको १३ लाख ५१ हजार र झारलको १३ लाख ५० हजार राजस्व तिर्न कम्पनी तयार भएका हुन् । अघिल्लो याम (असोज–मङ्सिर) मा नाउरको १२ लाख पाँच हजार र झारलको नौ लाख २० हजार बुझाइएको थियो ।
ट्र्याक एण्ड ट्रेल्र्स, नेपाल वाइल्ड लाइफ सफारिज र हिमालयन अउटफिटरले दुई÷दुई नाउर तथा एक÷एक झारलको शिकार गराउने छन् । यस्तै नेपाल वाइल्ड लाइफ एडभेञ्चरले एक नाउर र एक झारल, हिमालयन सफारिजले दुई नाउर र ग्लोबल सफारिज नेपालले एक नाउरको शिकार अनुमति पाएको छ ।
व्यवस्थित शिकारका लागि छ क्षेत्र तोकिएको विभागका व्यवस्थापन शाखा प्रमुख श्यामकुमार शाहले जानकारी दिनुभयो जसमा फागुने, बार्से, सेङ, दोगाडी, घुस्तुङ र सुनदह छ । शिकारीले रोजेको ठाउँमा कम्पनीले शिकार गराउने गर्छन् । ‘आवश्यक प्रक्रिया पूरा गरी कम्पनी शिकार गराउने तयारीमा छन्’, प्रमुख शाहले भन्नुभयो, ‘यो याममा १० नाउर र चार झारलको शिकार कोटा छ ।’ विभागले अघिल्लो महीना शिकारका लागि पेशेवर शिकारी अनुज्ञापत्र प्राप्त कम्पनीबाट शिलबन्दी दरभाउपत्र आह्वान गरेको थियो ।
नेपालमा शिकार कम्पनी थोरै भएकाले रकम कबोलमा बढी प्रतिस्पर्धा हुने गरेको ग्लोबल सफारिज नेपालका प्रबन्ध निर्देशक शम्शेर पराजुलीले बताउनुभयो । ‘कम्पनीले घाटा खाएरै भए पनि शिकार गराउँदैछन्’, उहाँले भन्नुभयो, ‘यो याममा राजस्व भने सबैभन्दा बढी उठेको छ ।’
उहाँका अनुसार १० नाउर र चार झारल शिकारका लागि कम्पनीले एक करोड ८९ लाख १० हजार राजस्व बुझाएको छ । शिकारको माग बढी हुँदा राजस्वको दर पनि बढ्ने र माग घट्दा राजस्व पनि घट्ने गरेको छ ।
चैत पहिलो सातादेखि शिकार खेल्न शुरु हुने ढोरपाटन शिकार आरक्षका कामु प्रमुख संरक्षण अधिकृत सरस्वती सापकोटाले बताउनुभयो । ‘आउँदो वैशाखसम्म शिकारको दोस्रो याम चल्छ’, उहाँले भन्नुभयो, ‘सौखिन र खर्चिला विदेशी शिकारी ढोरपाटन आउँछन् ।’ एउटै शिकारीले ३० देखि ३५ लाखसम्म शिकारमा खर्चने गरेको बताइन्छ ।
शिकारी हेलिकप्टरबाट आरक्षमा पुग्ने गर्छन् । शिकारी, आरक्ष कार्यालय तथा कम्पनीका प्रतिनिधि, भरिया र पथप्रदर्शकसहितको टोलीले १५ दिन आरक्षमा बिताउँछन् । शिकार खेल्न अमेरिका, रुस, स्पेन, साउथ अमेरिका, नर्वे लगायतका देशबाट पेशेवर शिकारी ढोरपाटन आउने गरेको आरक्ष कार्यालयले जनाएको छ ।
ढोरपाटनमा बर्सेनी असोज–मङ्सिर र फागुन–वैशाख गरी दुई याममा शिकार खुला गर्ने गरिएको छ । साहसिक यात्रा र रोमाञ्चक शिकार अनुभवका लागि ढोरपाटन विदेशीको रोजाइमा छ । विसं २०३९ स्थापना भएको ढोरपाटन देशकै एक मात्र शिकार आरक्ष हो । एक हजार ३२५ वर्ग किमीमा फैलिएको आरक्ष बागलुङ, म्याग्दी र रुकुम जिल्लाको उच्च पहाडी र हिमाली भू–भागमा अवस्थित छ ।
