फोरजी सेवा सुरु भएपछि गलकोटमा फागुन ५ देखि २१ सम्म सञ्चालन हुन गइरहेको मूर्तिकला कार्यशालामा आउने आन्तरिक तथा बाह्य पर्यटकलाई सहज भएको छ । कार्यशालामा ५ स्वदेशीसहित १० विदेशी मूर्तिकारको सहभागिता छ ।
फोरजीलाई उच्च गतिको इन्टरनेटसहितको मोबाइल सेवा मानिन्छ । फोरजी थ्रिजीभन्दा उच्च क्षमतायुक्त र तीव्र गतिको इन्टरनेट प्रविधि हो । शर्माका अनुसार फाेरजी इन्टरनेटको गति प्रतिसेकेन्ड एक सय मेगाबिट्स (एमबीपीएस) भन्दा माथि हुन्छ ।
ग्राहकले फोरजी सेवा लिन मोबाइल फाेनमा *1415*5# डायल गरी सस्तो दरमा विभिन्न प्याक खरिद गर्न सक्नेछन् । फोरजी आफ्नो सिमकार्डमा सुचारु भएको या नभएको थाहा पाउन मोबाइलमा *444# डायल गर्नुपर्ने हुन्छ । उच्च गतिको इन्टरनेट हुने भएकाले फोरजी प्रयोगकर्ताले अहिलेभन्दा सजिलो गरी भिडियो कल, च्याटसँगै इन्टरनेटका विभिन्न सेवासुविधा लिन सक्नेछन् ।
फोरजी प्रविधिले मोबाइलमै थ्रिडी भिडियोसमेत हेर्ने सुविधा दिने बताइएको छ । फोरजी सेवाले डिजिटल नेपालको लक्ष्यलाई पनि सघाउने इन्जिनियर शर्माको भनाइ छ ।
‘भौगोलिक जटिलताका कारण सबै ठाउँमा फाइबर पुर्याउन कठिन छ,’ उनले भने, ‘ग्रामीण क्षेत्रमा ब्रोडब्यान्ड (ताररहित) इन्टरनेट चलाउन फोरजी उपयोगी छ ।’ फोरजी राउटरबाट कम्युटरलगायत अन्य उपकरणमा पनि इन्टरनेट सञ्चालन गर्न सकिनेछ । ग्रामीण भेगमा १८०० र ८०० मेगाहर्जमा फोरजी चल्ने हुँदा सिग्नल कभरेज (पहुँच) पनि बढी ठाउँमा पुग्ने टेलिकमले जनाएको छ ।
