कोरोना संक्रमण बढ्दै गएपछि बागलुङ नगर क्षेत्रमा थप एक साताका लागि निषेधाज्ञा जारी राख्न जिल्ला सुरक्षा समितिलाई सिफारिस गरेको छ । जिल्ला कोभिड संकट व्यवस्थापन केन्द्रको सोमबारको बैठकले ९ गते राति १२ बजेदेखि भदौ १५ सम्म निषेधाज्ञा थप गर्न सिफारिस गरेको हो ।
प्रमुख जिल्ला अधिकारी सुरेश न्यौपानेको अध्यक्षतामा बसेको बैठकले यस्तो निर्णय लिएको जिल्ला प्रशासन कार्यालयका सूचना अधिकारी धीरेन्द्र पन्तले नयाँ विश्वलाई बताए । बजारमा कोराना संक्रमितको संख्या बढेको र समुदायमा फैलिएको भन्दै थप निषेधाज्ञा लागू गर्न बैठकले निर्णय गरेको बागलुङ उद्योग वाणिज्य संघका अध्यक्ष युवराज राजभण्डारीले जानकारी दिए ।
यसअघि जिल्ला कोभिड–१९ संकट व्यवस्थापन समितिको सिफारिसमा भदौ २ गतेदेखि निषेधाज्ञा गरिएको थियो । आज बसेको बैठकले बैंक, सहकारी विमा ,लघुवित्तलगायत वित्तीय संस्था पनि बन्द गर्ने निर्णय गरेको छ भने खाद्यान्न, दूध, फलफूल र तरकारी पसल पनि बिहान ६ देखि ९ बजेसम्म मात्र खोल्ने पाइने भएको छ ।खाद्यान्न, दूध, फलफूल र तरकारी पसल साँझ खोल्न पाइने छैन ।
आजदेखि कोरोनाको लक्षण देखिएका बिरामीलाई धौलागिरि अस्पताल, धौलागिरि बहुमुखी क्याम्पसस्थित प्रिआइसोलेसनमा र लक्षण नदेखिएका बिरामीलाई धौलागिरि बहिरा आवासीय मावि रामरेखामा राख्ने निर्णय भएको प्रजिअ न्यौपानेले नयाँ विश्वलाई बताए । बैठकमा कोरोना परीक्षण, रोकथाम, उपचार र नियन्त्रणको लागि भएको कामहरूको समीक्षा पनि भएको थियो ।
बैठकमा राजनीतिक दलका नेताहरू, नागरिक समाज, पत्रकार महासंघ, स्वास्थ्यकर्मी, बागलुङ उद्योग वाणिज्य संघ र उपभोक्ता मञ्चका प्रतिनिधिको उपस्थिति थियो । समितिले समुदायका केही व्यक्तिमा कोरोना देखिएकाले अत्यावश्यक सेवाबाहेक अरू बन्द गरिने जनाउँदै अत्यावश्यक काम नपरी घरबाट ननिस्कन र स्वास्थ्य सुरक्षा मापदण्ड पालन गर्न अनुरोध गरेको छ ।
बागलुङ–२ अस्पताल रोडकी होटल व्यवसायी महिला र वडा नं ३ हाडेपाखाकी कुखुरा व्यवसायी महिलामा कोरोना संक्रमण पुष्टि भएपछि समुदायमै फैलिएको आशंकामा भदौ २ गते निषेधाज्ञा गर्ने निर्णय भएको थियो । बजारमा जनप्रतिनिधि, स्वास्थ्यकर्मी, सैनिक, मजदुर, व्यवसायी, गृहिणी, पसलमा काम गर्ने कर्मचारीमा समेत कोरोना देखिएको छ ।
बागलुङ बजारमा मात्रै संक्रमितको संख्या १३ पुगेको छ । आज बानपा–२ श्रीनगर टोलका र वडा नं २ हाडेपाखाको दुई जनामा कोरोना पुष्टि भएको छ ।
धौलागिरि अस्पतालको आइसोलेसनमा ६ जना महिला र १२ जना पुरुष गरी १८ जना उपचाररत छन् । यसै गरी बागलुङमा कोरोना संक्रमितको संख्या २ सय ८३ जना पुगेको छ । तीमध्ये २ सय ६० जना निको भएर घर फर्किएका छन् भने एक जनाको मृत्यु भएको छ ।
