नौ बर्ष पहिले श्रीमान गुमाउनु परेको पिडालाई मन गाँठो पार्दै विस्तारै सम्हालेर जीउँदै आएकी मनकुमारी चोखाललाई प्रकृतिले फेरी विपत्ति निम्त्याईदिएको छ ।
विपन्नता र गरिवीले थात थालो समेत नरहेको अवस्थामा २०५६ सालमा सुकुम्बासी आयोगले दिलाईदिएको जग्गामा सानो छाप्रो बनाएर उनी वस्दै आएकी थिईन् ।
पति वियोगको पिडा सहेर ६३ बर्षको बुढ्यौलीमा एकल जीवन जीउन बाध्य उनको माथिबाट पहिरो झरेर ओत लाग्ने बासस्थान नै भत्काईदिएपछि झन विचल्लीमा परेकी छिन् । 
गलकोट नगरपालिका–७ आँगाखेतकी उनी अहिले छिमेकी श्यामबहादुर थापाको घरमा आश्रय लिएर बसेकी छन् । ‘श्रीमानले छोडेर गए, बुढेसकालमा रेखदेख गर्ने कोहि छैन’ चोखालले आँशु पुछ्दै भनिन्, ‘एक्लै भएपनि जेनतेन मन बाँधेरै वसेकी थिएँ, ओतलाग्ने झुप्रो पनि भत्कियो, अब कसरी÷ कहाँ बसौँ ?’ उनका आफ्ना सन्तान छैनन् ।
असार १४ गतेको बर्षाले घरमाथिको कुलोमा आएको बाढीले उनको घर हिलोमा डुवेको छ । असार महिनामा खन्न लागिएका मल्म–पाण्डवखानी सडकबाट बगेको ढुङ्गा, माटो र लेदो घरभित्रै पसेको छ ।
स्थानीय हुलुवा खोलाको किनारमा रहेको उनको घरपछाडीबाट पहिरो खसेको छ । घर क्षेतीग्रस्त छ । लत्ताकपडा र अन्नपात काम नलाग्ने भएका छन् । माथिबाट ढुङ्गा खसेपछि नजीकै रहेको गोठमा पनि क्षेती पुगेको छ ।
खोलाको किनारमा घर र माथिपट्टी सडक तथा सिचाई कुलो समेत रहेको ठाउँमा पहिरा झरेकाले जुनकुनै बेला पुरै बगाउन सक्ने जोखिम रहेको नगलकोट नगरपालिका–७ का वडा अध्यक्ष टिका बहादुर थापाले बताए ।
पहिरोले स्थानीय दिपज्योती प्राविलाई समेत जोखिममा पारेको छ ।
वडा अध्यक्ष थापाले स्थानीय अगुवासँग आफुले घटना स्थालको अवलोकन गरेरको जानकारी दिए । थापाले वडाबाट सक्दो सहयोग गर्ने भन्दै अन्य क्षेत्रबाट पनि सहयोग गरिदिन अपिल गरेका छन् ।
