डोनल्ड ट्रम्प कसरी होटल व्यवसायदेखि राष्ट्रपति पदसम्म पुगेका थिए

सन् २०२० को परिणामले ट्रम्पलाई सन् १९९० यता एक कार्यकाल मात्रै शासन गर्ने पहिलो अमेरिकी राष्ट्रपति बनाइदिएको छ।राष्ट्रपति पदका लागि प्रतिस्पर्धामा आउनुभन्दा धेरै अगाडिदेखि नै ट्रम्प अमेरिकामा एक रसिक अर्बपतिका रूपमा प्रख्यात थिए। उनी आफूलाई ‘द डोनल्ड’ भनेर चिनाउँथे।

संसारको एकजना सबैभन्दा शक्तिशाली राजनीतिज्ञका रूपमा रहेका उनको उमेर ७४ वर्ष छ।सन् २०१६ मा राष्ट्रपतिको उम्मेदवार बन्न खोज्दा नै आप्रवासनबारे उनको आपत्तिजनक मानिने धारणा र प्रचारप्रसार तथा विवादास्पद विगतका कारण ट्रम्पले रिपब्लिकन पार्टीबाट उम्मेदवार हुन पाउनेमा आशङ्का व्यक्त गरिन्थ्यो।

ट्रम्प न्यूयोर्कका एकजना घरजग्गा व्यापारी फ्रेड ट्रम्पका चौथो सन्तान हुन्। विद्यालयमा दुर्व्यवहार गर्न थालेपछि उनलाई १३ वर्षको उमेरमा एउटा सैन्य प्रतिष्ठानमा पठाइयो।

ट्रम्पले परिवारको व्यापार ब्रुक्लिन र क्वीन्सबाट म्यान्हटनमा सारेर कमजोर होटललाई बलियो बनाए। उनले प्रसिद्ध ६८-तले ट्रम्प टावर निर्माण गरे त्यस्तै ट्रम्प प्लेस, ट्रम्प वर्ल्ड टावर, ट्रम्प इन्टर्न्याश्नल होटलजस्ता संरचनाको निर्माण गरे।

मुम्बई, इस्तानबुल र फिलिपिन्समा पनि ट्रम्प टावरहरू छन्।ट्रम्पले होटल र क्यासिनोको क्षेत्रमा पनि व्यापार विस्तार गरे अनि मनोरञ्जन उद्योगमा पनि हात हाले।

सन् २००३ मा उनले एनबीसी टीभीमा एउटा रीआलिटी कार्यक्रम ‘द अप्रेन्टिस’ सञ्चालन गर्न थाले। उक्त कार्यक्रम १४ सीजन सञ्चालन गर्दा उनले २१.३ करोड अमेरिकी डलर पारिश्रमिक लिएको घोषणा गरेका थिए।

ट्रम्पले केही पुस्तक पनि आफ्नो नाममा प्रकाशित गरेका छन्। उनको स्वामित्वमा नेक-टाईदेखि बोटलबन्द पानीसम्म बेच्ने व्यवसायहरू छन्।फोर्ब्स म्यागजिनका अनुसार उनको कुल सम्पत्ति २.५ अर्ब डलरजति छ।

गत सेप्टेम्बरमा न्यूयोर्क टाइम्सले ट्रम्पले सन् २०१६ र राष्ट्रपति बनेको पहिलो वर्ष जम्मा ७५० डलर आयकर तिरेको विवरण प्रकाशित गरेको थियो। तर ट्रम्पले त्यसलाई ‘मिथ्या समाचार’ भन्दै खण्डन गरे।

ट्रम्पले तीन पटक बिहे गरे। उनकी प्रथम पत्नी इभाना जेलनिक्कोभा चेक धाविका तथा मोडल थिइन्।उनीहरूका तीन सन्तान डोनल्ड जूनीअर, इभान्का र एरिक छन्। तर इभानाले सन् १९९० मा सम्बन्धविच्छेदको आवेदन दिएपछि सञ्चारमाध्यममा त्यसबारे ठूलो चर्चा भयो।

ती समाचारमा इभानाले ट्रम्पले आफूलाई शोषण गरेको आरोपबारे पनि चर्चा गरिएको थियो। तर पछि उनले ती घटनाबारे नरम बोलेकी थिइन्।

ट्रम्पले पहिलो पटक सन् १९८७ मा राष्ट्रपतिको निर्वाचनमा उठ्ने इच्छा व्यक्त गरेका थिए। सन् २००० मा उनी रिफर्म पार्टीबाट उम्मेदवार पनि बनेका थिए।

बाराक ओबामा अमेरिकामा जन्मिएका हुन् कि हैनन् भनेर प्रश्न सोध्ने अभियानमा ट्रम्प सन् २००८ पछि सहभागी भए। ओबामा हवाईमा जन्मिएको प्रमाण छ। ट्रम्पले त्यो स्वीकारे पनि क्षमायाचना भने गरेनन्।जुन २०१५ मा ट्रम्पले औपचारिक रूपमै राष्ट्रपतीय निर्वाचनमा प्रतिस्पर्धा गर्ने घोषणा गरे।

‘मेक अमेरिका ग्रेट अगेन’ नारासहित उनले एउटा विवादास्पद अभियान थाले। अमेरिकी अर्थतन्त्रलाई सुदृढ बनाउने, मेक्सिकोसँग अमेरिकाको सीमामा पर्खाल बनाउने र मुसलमान आप्रवासीलाई अमेरिका आउन अस्थायी प्रतिबन्ध लगाउने उनको वाचा थियो।

राष्ट्रपतिको कार्यकाल

केही महिलापछि उनले एफबीआईका निर्देशक जेम्स कमीलाई पदमुक्त गरिदिए।सन् २०१६ मा ट्रम्पपक्षीय निर्वाचन अभियान र रुसबीच सहकार्य भएको आरोपको अनुसन्धानसँग त्यो निर्णयको सम्बन्ध भएको आशङ्का गरिएको छ।

यो निर्वाचनको परिणामप्रति असन्तुष्टि व्यक्त गर्दै ट्रम्पले असन्तुष्टि व्यक्त गर्दै धाँधली भएको आरोप लगाएका छन्। तर उनले आरोप पुष्टि गर्न कुनै प्रमाण देखाएका छैनन्।

“उनीहरू सत्य बाहिर आओस् भन्ने चाहन्नन्,” उनको वक्तव्यमा लेखिएको छ।गणना गरिएको मत प्रमाणीकरण हुन बाँकी भएको र सार्वजनिक भएको परिणाम सञ्चारमाध्यमको प्रक्षेपणमात्र भएको सङ्केत गर्दै उनले भने, “सामान्य तथ्य के हो भने यो निर्वाचन सकिइसकेको छैन।”

बीबीसीनेपालीबाट