एआईको प्रयोग गरेर प्रश्नहरूको उत्तर दिन वा प्रयोगकर्ताहरूको मागअनुसार लेख वा कोड सिर्जना गर्न प्रयोग हुने च्याटबट ‘च्याटजीपीटी’ सन् २०२२ को नोभेम्बरमा सञ्चालनमा आएदेखि इतिहासमै सबैभन्दा तीव्र रूपमा प्रयोगकर्ताहरू बढेको एप्लिकेशन बनेको छ।
दुई महिनामा यसका सक्रिय प्रयोगकर्ता १० करोड पुगेका छन्।
प्रविधि अनुगमन गर्ने कम्पनी सेन्सर टाउनका अनुसार इन्स्टाग्रामलाई सोही सङ्ख्यामा प्रयोगकर्ता हासिल गर्न साढे दुई वर्ष लागेको थियो।
माइक्रोसफ्टको आर्थिक सहयोगमा ओपनएआई कम्पनीद्वारा विकसित च्याटजीपीटीको व्यापक लोकप्रियतापछि मानवजातिको भविष्यबारे आर्टिफिशल इन्टेलिजन्सको प्रभावबारे विभिन्न आकलन हुन थालेको छ।
यद्यपि अन्य केहीले भने यसबारे आवश्यकताभन्दा बढी डर फैलिएको टिप्पणी गरेका छन्।
च्याटजीपीटी, डाल-ई, बार्ड र अल्फाकोडजस्ता एआई प्रयुक्त सफ्टवेअरद्वारा सिर्जित (निबन्ध, कविता र चुट्किलादेखि कम्प्युटर कोडसम्मका) लेख र (रेखाचित्र, तस्बिरहरू र कलाकृतिजस्ता) चित्रहरू मान्छेको रचनाबाट केकति फरक छन् भनेर सहजै खुट्ट्याउन सकिँदैन।
तिनलाई विद्यार्थीहरूले गृहकार्य लेख्नदेखि राजनीतिज्ञहरूले भाषणहरू लेख्नसम्म पनि प्रयोग गरेका छन्। डेमोक्रेटिक नेता जेक असिनक्लोसले अमेरिकी संसद्मा उक्त प्रविधि प्रयोग गर्न थालेका थिए।प्रविधिसम्बन्धी प्रसिद्ध कम्पनी आईबीएमले आफ्ना ७,८०० पदमा मानिसलाई भर्ती गर्न बन्द गर्ने र ती काम एआईद्वारा गर्ने बताएको छ।
न्यारो एआई अथवा एनएआई निर्धारित दायराभित्र दोहोरिने कामहरू गर्दै एउटा कार्यमा केन्द्रित हुन्छ।यसले सामान्यतया इन्टरनेटलगायत विभिन्न स्रोतबाट डेटा लिन्छ र आफैँलाई प्रशिक्षित गर्छ। तर उसले लिने जानकारीहरू विशेष क्षेत्रको मात्र हुन्छ।
उदाहरणका लागि, एआई एक चेस प्रोग्रामले चेसको विश्वविजेतालाई हराउन सक्छ, तर त्योबाहेक अन्य कार्य गर्न सक्दैन।
चालकरहित कार र च्याटजीपीटीजस्ता परिष्कृत प्रणालीहरू पनि न्यारो एआईका प्रकार हुन्। तिनले निर्धारित भूमिकाहरूको दायराबाहिर काम गर्न सक्दैनन्। त्यसैले तिनीहरू आफैँ निर्णय गर्न सक्दैनन्।यद्यपि केही विज्ञहरूले च्याटजीपीटी वा अटोजीपीटीजस्ता स्वचालित रूपमा जानकारी लिने प्रणालीहरू विकासको अर्को चरणमा जान सक्ने ठानेका छन्।
२. आर्टिफिशल जेनरल इन्टेलिजन्स (एजीआई)
कुनै उपकरणले मानिसले गर्न सक्ने तहको कुनै पनि बौद्धिक कार्य गर्न अवस्थामा आर्टिफिशल जेनरल इन्टेलिजन्सको चरणमा पुगिन्छ।यसलाई “बलियो एआई” पनि भनिन्छ।
छ महिनाको विश्राम
सन् २०२२ को मार्चमा १,००० भन्दा बढी प्रविधिविज्ञहरूले “सबै एआई ल्याबहरूलाई तत्काल कम्तीमा छ महिनाका लागि च्याटजीपीटीको नवीनतम संस्करण जीपीटी-४ भन्दा शक्तिशाली एआई प्रणालीहरूको प्रशिक्षण रोक्न” आह्वान गरेका थिए।
“मान्छेको प्रतिस्पर्धी बनेको एआईले समाज र मानवतामा गहिरो जोखिम निम्त्याउन सक्छ,” एपलका सहसंस्थापक स्टीभ ओज्निआकसँगै टेस्ला र स्पेसएक्सका मालिक इलन मस्कलगायत अन्य प्रविधि पैरवीकर्ताहरूले भनेका थिए।
मस्क ओपनएआईका सहसंस्थापकहरूमध्ये एक थिए। पछि उक्त कम्पनीको नेतृत्वमा रहेका अन्यसँग असहमतिका कारण उनले त्यहाँबाट राजीनामा दिए।
त्यस अवधिमा उपयुक्त सुरक्षा उपायहरू तयार गर्न र कार्यान्वयन गर्न सकिने उनीहरूले बताएका थिए।
‘जति तीक्ष्ण त्यति मूर्ख’
अक्सफर्ड यूनिभर्सिटीको एआई इन्स्टिट्यूट फर एथिक्सकी करिसा भेलिजले पनि उक्त पत्रमा हस्ताक्षर गरेकी थिइन्।तर पछि उनले सेन्टर फर एआई सेफ्टीले दिएको ‘मानवजाति लोप हुने चेतावनी’ हदभन्दा पर गएको ठानिन् र त्यसमा भने हस्ताक्षर गरिनन्।
उनले बीबीसीका एन्ड्रू वेबलाई भनिन्, “हामीले अहिले जुन प्रकारको एआई निर्माण गरिरहेका छौँ त्यो जति तीक्ष्ण छ त्यति नै मूर्ख पनि छ।””यदि कसैले च्याटजीपीटी वा अन्य एआईहरूको प्रयोग गरेका छन् भने उनीहरूलाई त्यस्ता प्रविधिको सीमाहरू थाहा हुने छ।”
एआईले ठूलो सङ्ख्यामा गलत जानकारी उत्पादन गर्न सक्नेबारे पनि उनी चिन्तित छिन्।”सन् २०२४ मा अमेरिकामा चुनाव हुँदै छ र ट्विटरलगायत अन्य महत्त्वपूर्ण सञ्जालहरूले आफ्नो एआई नीति तथा सुरक्षा टोलीहरू हटाइरहेका छन् । म यसबारे धेरै चिन्तित छु।”
अमेरिकी संसद्ले ओपनएआईका प्रमुख कार्यकारी अधिकृत साम अल्टम्यानलाई च्याटजीपीटीबारे सुनुवाइका लागि बोलाएको थियो।
फ्यूचर अफ लाइफ इन्स्टिट्यूटका सार्वजनिक नीति अनुसन्धानकर्ता कार्लोस इग्नासियो गुटेरेसले जलवायु परिवर्तनसम्बन्धी मामिला हेर्न आईपीसीसीजस्तो अन्तरसरकारी निकाय भएजस्तै “एआईलाई कसरी नियमन गर्ने भन्ने निर्णय गर्ने विज्ञहरूको कुनै निकाय नहुनु” मुख्य चुनौती भएको बीबीसीलाई बताए।
त्यस चुनौतीले हामीलाई एआईको तेस्रो र अन्तिम चरणमा पुर्याउँछ।
३. आर्टिफिशल सुपर इन्टेलिजन्स (एएसआई)
हामी दोस्रो चरण (एजीआई) पुगेको अवस्थामा अकस्मात् एआईको तेस्रो चरण अर्थात् आर्टिफिशल सुपर इन्टेलिजन्स (एएसआई)मा पुगिन्छ भन्ने विचार एआईको तेस्रो चरणको सिद्धान्त हो। आर्टिफिशल इन्टेलिज१२न्स मानव बुद्धिमत्ताको तुलनामा उच्च स्तरको हुने अवस्थामा यो चरण सुरु हुन्छ।
अक्सफर्ड यूनिभर्सिटीका दार्शनिक तथा एआई विज्ञ निक बोस्ट्रम एएसआईलाई त्यस्तो बौद्धिकताका रूपमा व्याख्या गर्छन् जसले “वैज्ञानिक रचनात्मकता, सामान्य बौद्धिकता र सामाजिक सीपलगायत व्यावहारिक रूपमा हरेक क्षेत्रहरूमा मानव मस्तिष्कको तुलनामा निकै उत्कृष्ट प्रदर्शन गर्छ।”
“इन्जिनियर, नर्स वा वकिल बन्न मानिसहरूले निकै समय अध्ययन गर्नुपर्छ। तर एजीआईको हकमा [सम्भव भएसम्म] यसले हामी मानवले भन्दा निकै कम समयमा अनवरत रूपमा आफूलाई सुधार्न सक्छ,” गुटेरेस व्याख्या गर्छन्।
यो विचारले ‘द टर्मिनेटर’ चलचित्रको कथा झल्काउँछ।त्यस कथामा मशीनहरूले मानवजाति उन्मूलन गर्ने उद्देश्यले पारमाणविक युद्ध सुरु गर्छन्।
प्रिन्सटन यूनिभर्सिटीका का कम्प्युटर वैज्ञानिक अरविन्द नारायणनले यसअघि बीबीसीसँग कुरा गर्दै साइन्स फिक्शनमा आधारित चलचित्रमा देखाइने विध्वंशका परिवेशहरू अवास्तविक हुने बताएका थिए।
“एआईको वर्तमान अवस्था त्यस्तो जोखिम निम्त्याउन सक्नेगरी सक्षमतासँग कत्ति पनि नजिक छैन। फलस्वरूप यसले निकट भविष्यमा एआईले ल्याउन सक्ने सम्भावित हानिहरूबाट ध्यान हटाएको छ।”
हिन्टन मशीनहरूलाई अनुभवका आधारमा प्रशिक्षण गर्ने कामका लागि परिचित छन्।
गुगलबाट आफ्नो बहिर्गमनको घोषणा गर्न न्यूयोर्क टाइम्सलाई पठाइएको एक वक्तव्यमा हिन्टनले आफ्नो विगतका कार्यहरूका लागि पश्चात्ताप व्यक्त गरे किनकि उनी “खराब काम गर्नेहरू”ले एआईको प्रयोग गरेर “दुष्कर्म” गर्नेप्रति चिन्तित थिए।
बीबीसीसँगको एक अन्तर्वार्ताको क्रममा उनले एउटा “दुःस्वप्न परिदृश्य”को वर्णन गरे।“मानौँ [रुसी राष्ट्रपति भ्लादिमिर पुटिन]जस्ता खराब काम गर्ने व्यक्तिले रोबटहरूलाई आफ्नै सहायक लक्ष्यहरू उत्पन्न गर्ने क्षमता प्रदान गर्यो भने त्यसले अप्रत्याशित परिणामहरू निम्त्याउन सक्छ।”
तर हिन्टनले “छोटो अवधिमा” एआईले जोखिमको तुलनामा धेरै फाइदाहरू प्रदान गर्ने आफूले सोचेको बताए।”त्यसैले मलाई हामीले यो प्रविधिको विकास गर्न बन्द गर्नुपर्छ जस्तो लाग्दैन,” उनले थपे।
लोप वा अमरत्व
यसबारे बेलायती भौतिकशास्त्री स्टीभन हकिङले कडा चेतावनी दिएका थिए।
एआईबारे सबैभन्दा उत्साहित भविष्यवादी आविष्कारक तथा लेखक रे कुर्जवेल हुन्।गुगलमा एआई अनुसन्धाताका रूपमा कार्यरत उनी सिलिकन भ्यालीस्थित सिन्ग्यल्यारिटी यूनिभर्सिटीका सहसंस्थापक हुन्।
न्यानोबट र अमरत्व
कुर्ज्वेल मानिसहरू निकै नै बुद्धिमान् एआईको प्रयोग गरेर जैविक अवरोधहरू पार गर्न सक्षम हुने कुरामा विश्वास गर्छन्।सन् २०१५ मा उनले २०३० सम्ममा मानिसहरूले न्यानोबट (अतिसूक्ष्म रोबट)को प्रयोगमार्फत् अमरत्व हासिल गर्न सक्ने भनेर भविष्यवाणी गरेका थिए।
यी न्यानोबटहरू हाम्रो शरीरभित्र अवस्थित हुन्छन् र आफैँ चोटपटक वा रोग निको पार्छन्।
गुटेरेस एआई शासन प्रणालीको निर्माण गर्नु महत्त्वपूर्ण रहेको कुरामा सहमत छन्।“एउटा यस्तो भविष्यको कल्पना गर्नुहोस् जहाँ कुनै निकायसँग प्रत्येक व्यक्ति र तिनको बानीबारे यति धेरै जानकारी छ कि त्यसले हामीलाई थाहा नहुने तरिकामा नियन्त्रण गर्न सक्छ,” उनले भने।
“मानव र रोबटबीचको युद्ध सबैभन्दा नराम्रो अवस्था होइन। बरु हामीले आफूमाथि नियन्त्रण भएको महसुस नगर्नु सबैभन्दा नराम्रो अवस्था हो।””किनकि हामी आफूभन्दा निकै बुद्धिशाली तत्त्वसँग सगोलमा बस्दै छौँ।”
बीबीसीनेपालीबाट