कला, संस्कृतिको संरक्षण कृषि, पर्यटन, उघोग तथा व्यापारको प्रवद्र्धन भन्ने मुल नाराका साथ यही पुस १४ गतेदेखि २३ गतेसम्म संचालन हुन लागेको बागलुङ महोत्सवमा प्रदेश नं ४ स्तरीय फोटो प्रदर्शनी हुने भएको छ ।
उक्त फोटो प्रदर्शनीमा १० वटा स्थानीय तहको कृषि, पर्यटन, पशुपालन, घरेलु उत्पादन, जीवनशैली, समाज र मनोरम प्राकृतिक स्थलहरूका आकर्षक फोटोहरू प्रदर्शनीमा राखिने बागलुङ महोत्सव फोटो प्रदर्शनी उप–समितिका संयोजक अर्जुन चोखालले जानकारी दिए ।
महोत्सवको मुल नारा अनुरूप आयोजित प्रदर्शनीमा पश्चिम क्षेत्रका पोखरा, लुम्बिनी, गुल्मी, पर्वत बागलुङ, म्याग्दी, मुस्ताङ, रूकुम र डोल्पादेखि मुगु जिल्लासम्मका विविध सम्भावना बोकेका फोटोहरू समेटिएको महोत्स उप–समिति सदस्य तथा नेपाल पत्रकार महासंघ बागलुङका सचिव राम थापा अविरलले बताए ।
फोटोलाई राम्रोसँग फोटोको सौन्दर्यकला नमर्ने गरि प्रदर्शनी (धौलागिरी बहुमुखी क्याम्पसको ३ नं हल) स्थलमा आकर्षक ढंगको ध्वनी, प्रकाश र फोटो स्ट्याड सहितको व्यवस्थापनमा राखिने बागलुङ उद्योग वाणिज्य संघका अध्यक्ष तथा बागलुङ महोत्सव मुल समिति संयोजक जयराम भारीले बताए ।
२० रूपैयाँ टिकट शुल्क निर्धारण गरिएको प्रदर्शनीमा दर्शकहरुले मन परेको खण्डमा प्रदर्शित फोटोहरु खरिद गर्न समेत सक्ने संयोजक चोखालले बताए । प्रदर्शनीमा धौलागिरि अंचलका विभिन्न फोटो पत्रकारहरूका करिब १ सय फोटोहरू समावेश गरिने आयोजकले जानाकारी दियो । पौष २४ गतेसम्म संचालन हुने प्रदर्शनीमा आयोजकहरुले अवलोकनकर्ताहरुको ठूलो अपेक्षा गरेको छ ।
