बागलुङ। ढोरपाटनमा पहिलो सिकार याम चलिरहेको छ । नेपालको एकमात्र सिकार आरक्ष ढोरपाटनमो पहिलो याममा सिकार खेल्न केही सिकारी ढोरपाटन पुगेका छन् ।
पहिलो सिजनमा ११ नाउर र सात झारल सिकार गर्न दिइएको अनुमती अनुसार मौसम सफा भएसंगै सिकारीहरु सिकार ब्लकमा पुगेको सिकार आरक्षले जनाएको छ ।
सिकारका लागि ११ जना विदेशी सिकारीसहितको टोली सुर्तिवाङबाहेकका छवटा ब्लकमा पुगिसकेको रेन्जर सागर सुवेदीले जानकारी दिनुभयो ।
ढोरपाटनमा कात्तिकमा पहिलो र चैत–वैशाखमा दोस्रो सिकार सिजन सञ्चालन हुन्छ । सिकारका लागि छुट्याइएका नाउर र झारलमध्ये पोथी तथा निश्चित उमेर नपुगेका जनावरको सिकार गर्न पाइँदैन ।
पाको उमेरका भाले जनावरलाई मात्रै सिकार अनुमति दिइने भएकाले उत्पादनमा खासै असर नपर्ने सुवेदीको भनाइ छ ।
ढोरपाटन सिकार आरक्षमा सुर्तिवाङ, फागुने, बार्से, घुस्तुङ, दोगाडि, सुनदह र सेङ गरी सातवटा सिकार ब्लक छन् । तीमध्ये बागलुङ र रुकुममा तीन–तीन तथा म्याग्दीमा एउटा ब्लक पर्दछ ।
नेपालको एकमात्र सिकार आरक्ष भएकाले यहाँ नाउर र झारलको नियन्त्रित सिकार गर्न विदेशी सिकारी आउने गर्छन् ।
अमेरिका, युरोप र अस्ट्रेलियालगायतका देशबाट आउने सिकारीले करिब दुई साता आरक्षका विभिन्न ब्लकमा बिताउने गरेका छन् ।
राष्ट्रिय निकुञ्ज तथा वन्यजन्तु संरक्षण विभागले बोलपत्रमार्फत सिकारको अनुमति दिने गरेको छ ।
