सांकेतिक तस्बिर
नुवाकोटमा अज्ञात समूहले बम विस्फोट गराएका छन्। गएराति जिल्लाको ककनी गाउँपालिका–१ को वडा कार्यालयमा अज्ञात समूहले बम विस्फोट गराएका हुन् । वडाध्यक्ष चन्द्रबहादुर श्रेष्ठ (बलामी) का अनुसार बम विस्फोटबाट वडा कार्यालयमा रहेका महत्वपूर्ण उपकरण तथा कागजपत्र सबै जलेर नष्ट भएको छ।
उनका अनुसार रातको ११ः४५ बजेको समयमा आएका पाँच छ जनाको समूहले कार्यालयमा तोडफोड गरेर कागजात, कम्युटर, फर्निचरलगायतका सामग्री एकै स्थानमा राखेर आगजनीसहित बम विष्फोट गराएको पाइएको छ ।
बम विष्फोटले उक्त भवनको ढलानसमेत फुट्न पुगेको प्रहरी चौकी ओखरपौवाले जनाएको छ । घटनाबारे थप अनुसन्धान भइरहेको प्रहरीले जनाएको छ ।
नेत्रविक्रम चन्द विप्लव नेतृत्वको प्रतिबन्धित नेकपाले बुधबार बागमतीसहितका क्षेत्रमा बन्दको आह्वान गरेको छ । उक्त समूहले बिस्फोट गराएको हुनसक्ने प्रहरीको अनुमान छ । यद्दपी विस्फोटको जिम्मा भने कसैले लिएको छैन ।
