सिंहदबारको राष्ट्रिय योजना आयोगमा मंगलबार कार्यालयभित्रै मृत अवस्थामा फेला परेका नायब सुब्बा बच्चुराम केसीको साथबाट सुसाइड नोट फेला परेको छ । महानगरी प्रहरी परिसर काठमाडौंका प्रवक्ता प्रहरी नायब उपरीक्षक होविन्द्र बोगटीका अनुसार केसीको साथमा सुसाइड नोट भेटिएको हो ।
बोगटीका अनुसार, सुसाइड नोटमा श्रीमतीको नाम लिएर ‘थोरै अंश पाइयो भनेर चिन्ता नगर्नू’ भनेका छन् । आफूले ‘कसैका कारण आत्महत्या गरेको होइन । पत्रकार वा अन्यले अर्को अर्थ नलगाउन्’ भन्ने समेत उनले नोटमा लेखेका छन् ।
कीर्तिपुरस्थित टौदहमा बस्दै आएका केसीले सोमबार बिहान कार्यालय आएपछि घर नगएको पाइएको छ ।
साँझ ५ः२७ बजे केसी बाहिर निस्केको सीसीटिभी फुटेजमा देखिएको प्रहरीले जनाएको छ । त्यसपछि केसी राति ११ बजे कार्यालय छिरेको पाइएको छ ।
पूर्वसहकर्मीका अनुसार परराष्ट्रमा भएका बेला सरकारी कर्मचारीको पासपोर्ट किर्ते गरेको मुद्दा उनीमाथि चलिरहेको थियो ।
