रकम जम्मा गर्न अब बैंक कार्यालयमै पुग्नुपर्ने झन्झटको अन्त्य हुने भएको छ । ग्राहकको सहजताका लागि नविल बैंकले बुधबारदेखि नबिल क्यास मसिन ल्याएपछि एटीएममार्फत रकम झिक्ने मात्र नभई बैंक खातामा जम्मा पनि गर्न सक्ने सुविधा सुरु भएको छ ।
यो प्रविधि बैंकले सुरुवातमा नबिल बैंकको तीनधारा शाखा र पुल्चोक शाखाबाट सुरु गरेको छ ।
विस्तारै अन्य एटीएम बुथमा पनि यो प्रविधिबाट रकम जम्मा गर्ने सुविधा दिइने बैंकले जनाएको छ । अब ग्राहकहरुले मसिनमा एक हजार, पाँच सय र एक सय रूपैयाँको नेपाली रुपैयाँ जम्मा गर्न सक्नेछन् ।
एक पटकमा ९९ हजार ९ सय रूपैयाँ जम्मा गर्न सकिनेछ । ग्राहकले नबिलको कुनै पनि बचत र चल्ती खातामा रकम जम्मा गर्न सक्नेछन् । साथै यसमार्फत ग्राहकले आफ्नो क्रेडिट कार्ड भुक्तानी पनि गर्न सक्ने बैंकले जनाएको छ ।
