ताराखोला गाउँपालिकाले ज्येष्ठ नागरिकलाई न्यानो कपडा वितरण गरेको छ । गाउँपालिकाले आर्थिक वर्ष २०७८ र ७९ को स्वीकृत निति तथा कार्यक्रम अनुसार वडा नम्बर ४ ताराका ८५ वर्ष माथिका १२ जना ज्येष्ठ नागरिकहरुलाई सम्मानसहित फाईवर सिरक तथा टर्चलाईट वितरण गरिएको हो ।
कार्यक्रममा ताराखोला गाउँपालिकाका उपाध्यक्ष दिल कुमारी पुनले ज्येष्ठ नागरिकहरु हाम्रा सम्मानित व्यक्तिहरु भएको र सामाजिक विकासमा पुर्याएको योगदानको प्रसंशा गरेका छन् ।
अहिलेको खानपान र रहनसहन अव्यवस्थित रहेकोले यसलाई व्यवस्थित गरेमा लामो समयसम्म वाच्न सकिने मन्तव्य राखेका छन् ।
कार्यक्रम ताराखोला गाउँपालिका वडा नम्वर ४ का वडा अध्यक्ष जित बहादुर खत्रीको अध्यक्षता, वडा सदस्य सपना धरि बुढाथोकीको स्वागत र ताराखोला गाउँपालिकाका प्रशासन सहायक जित सुनारको सञ्चालनमा सम्पन्न भएको थियो ।यसै विच वडा नं ४ तारामा मेलमिलाप केन्द्रको स्थापना गरिएको छ ।
गाउँपालिका उपाध्यक्ष तथा न्यायिक समितिका संयोजक दिल कुमारी पुनद्वारा साईनवोर्ड अनावरण गरेर उद्घाटन गरिएको थियो ।
गाउँपालिका भित्रका प्रत्यक वडामा मेलमिलाप केन्द्र स्थापना गर्ने योजना रहेको गाउँपालिकाले जनाएको छ ।वडास्तर मै स्थापना हुने केन्द्रले गाउँपालिकामा आउने विवादका मुद्दाहरुलाइ वडा स्तरमा नै समाधान गर्न सहज हुने उपाध्यक्ष पुनको विश्वास रहेको छ ।
कार्यक्रममा वडा नम्बर ४ का मेलमिलापकर्ताहरुका लागि कानुन तथा ऎन नियम र संविधान सम्बन्धि पुस्तकहरु र मेलमिलाप केन्द्रको कार्यालय व्यवस्थापनका लागि आवश्यक फर्निचर समेत प्रदान गरिएको थियो ।
गाउँपालिकाले यस अघि गाउँपालिका भित्रका सबै वडाहरुका मेलमिलापकर्ताहरुका लागि १ हप्ते क्षमता अभिवृद्धि सम्बन्धि तालिम समेत सम्पन्न गरिसकेको गाउँपालिकाका प्रमुख प्रशासकिय अधिकृत खिम विश्वकर्मा बताए ।
