बागलुङ । जिल्ला प्रशासन कार्यालय, बागलुङबाट सरुवा भएर जान लाग्नु भएका प्रमुख जिल्ला अधिकारी नेत्र प्रसाद सुवेदीलाई विदाई गरिएको छ ।
बागलुङ नगरपालिकाको आयोजनामा गृह मन्त्रालय सरुवा भई जान लाग्नु भएका प्रमुख जिल्ला अधिकारी सुवेदीलाई शनिबार विदाई गरिएको हो ।
बागलुङमा रहदा जिल्लाको शान्ति सुरक्षा, सेवा प्रवाह र विकास निर्माण कार्यमा गर्नुभएको सहजिकरणका लागि बागलुङ नगरपालिकाका मेयर बसन्त कुमार श्रेष्ठले प्रमुख जिल्ला अधिकारी सुवेदीलाई धन्यवाद दिनु भएको थियो ।आफनो बागलुङ बसाईको क्रममा समन्वय र सहयोग गर्नु भएकोमा नगरपालिकालाई सुवेदीले धन्यवाद दिनु भएको थियो ।
कार्यक्रममा नगरपालिकाका प्रमुख प्रशासकीय अधिकृत हरिदत्त कँडेलले प्रमुख जिल्ला अधिकारी सुवेदीसँग सहकार्य गरेर धेरै काम सहज भएको बताउनुभयो ।
सुवेदीलाइै गृह मन्त्रालयले दश महिनाअघि बागलुङको प्रमुख जिल्ला अधिकारीमा सरूवा गरेर पठाएको थियो ।
बागलुङमा नयाँ प्रमुख जिल्ला अधिकारीको रुपमा कुमान सिंह गुरुङलाई पठाएको छ । गण्डकी प्रदेशका सचिव रहेका गुरुङ गृहमा सरुवा पश्चात बागलुङको प्रमुख जिल्ला अधिकारीको रुपमा पठाएको हो ।
