अष्ट्रेलियामा यस महिना प्राकृतिक प्रकोपको लहर देखा परेको छ।
गत हप्ता धुले आँधीले आक्रान्त बनेको अष्ट्रेलियाको जन–जीवन यतिबेला बाढी र डढेलोजस्ता प्राकृतिक प्रकोपले अस्तव्यस्त भएको छ।
अष्ट्रेलियाको क्वीन्सल्याण्डमा रहेका बाक्ला झाडीहरुमा बाक्लो डढेलो लागेका कारण बुधबार त्यहाँका हजारौं नागरिकलाई सुरक्षित स्थानमा जान आग्रह गरिएको छ।
क्वीन्सल्याण्डमा यतिबेला विभिन्न १ सय ३० स्थानका बाक्ला झाडीहरुमा आगलागी भइरहेको छ। यस्तो खतरनाक अवस्था क्वीन्सल्याण्डमा यसअघि कहिल्यै नआएको त्यहाँका नागरिकहरुले बताएका छन्।
सिड्नीको बाढी
यसैबीच अष्ट्रेलियाको अर्को शहर सिड्नीमा बाढीले जन–जीवनलाई कष्टकर बनाएको छ। बाढीका कारण बाटोमा समेत पानी जमेको छ।
बाढीका कारण त्यहाँ ५ सयभन्दा बढी मानिसलाई आपतकालिन सहायता प्रदान गरिनुपर्ने अष्ट्रेलियाका संचार माध्यमहरुले जनाएका छन्।
सिड्नीको बाटामा बाढी पसिरहँदा त्यसबाट बच्ने क्रममा कार दुर्घटना समेत भएको थियो। दुर्घटनामा एक जनाको मृत्यु भएको जनाइएको छ। एजेन्सी
