कोरोना भाइरस संक्रमणले खाडीसहित मध्यपूर्वका देशमा तीव्रता लिएपछि त्यहाँ रहेका लाखौं नेपाली समुदाय पनि त्रस्त बनेका छन्। यूएईस्थित नेपाली दूतावासले उनीहरूलाई उच्च सतर्कता अपनाउन आग्रह गर्दै विज्ञप्ति जारी गरेको छ ।
मध्यपूर्वमा मात्र निर्माण, सेवा, व्यवसाय एवम् अन्य क्षेत्रमा गरी झन्डै १५ लाख नेपाली कार्यरत रहेको अनुमान छ । मध्यपूर्वका १२ राष्ट्रमा अहिले कोरोना भाइरसको सन्त्रास छ। बुधबार साँझसम्मको रिपोर्ट अनुसार इरानमा यसबाट २१० जनाको मृत्यु भइसकेको छ भने २३३६ जना संक्रमित भएका छन्। जसमध्ये केही राज्यको उपल्लो तहका अधिकारीसमेत छन्।मध्यपूर्वमा इरानपछि कुवेतमा ५६ र बहराइनमा ४९ जना संक्रमित पुष्टि भएको सञ्चारमाध्यमले उल्लेख गरेका छन्।