बागलुङ । बागलुङ जिल्लाको बडिगाडमा एकै रातमा ६ वटा घरमा चोरी भएको छ।बडिगाड गाउँपालिका वडा नम्बर-५ खौलार बजारमा मंगलबार राति एकै साथ ६ घरबाट सुन सहित ५ लाख बराबरको चोरी भएको हो ।
घनाबस्ती भएको बजारका आधा दर्जन घरमा एकैरातमा चोरी भएपछि स्थानीय जनता त्रसित भएका छन् ।
मंसिर १९ गते रातको २ बजेको हाराहारीमा बजारका ५ वटा पसल तथा एक घरमा नगद र सुनचाँदी गरि ५ लाख बराबरको चोरी भएको बडिगाड गाउँपालिका वडा नम्बर-५ का वडा अध्यक्ष विष्णुप्रसाद आचार्यले बताए ।
मंगलबार रातको २ बजेदेखि ३ बजेको समयमा टारी स्थित अर्जुन प्रसाद खरेलको घरबाट साढे ३ तोला सुन, खौलार बजारको प्रज्वल दाना पसलबाट नगद ६० हजार, खरेल भाडा पसल तथा हार्डवयरबाट नगद १५ हजार, जलजला होटलबाट नगद १० हजार, मायालु होटलबाट ५ हजार, र कक्षपती स्टोर्सबाट ४ हजार नगद चोरी भएको आचार्यले बताए ।
सबै घरहरुका ताल्चा फुटालेर चोरहरु प्रवेश गरेको पाइएको छ। चोरी भएका हरेक पसलमा घरको पछाडिबाट च्यानल गेटको ताल्चा फुटाएर चोरी गरिएको पीडितले बताएका छन ।
चोरी भएको खरेल भाँडा पसल तथा हार्डवयरको सिसिक्यामेरामा देखिएको दृश्य अनुसार एकजना अधबैंसे पुरुष मुहारमा मुकुण्डो लगाएको, झोला बोकेको र पीपिइ लगाएर घरको पछाडिबाट छिरेर चोरी गरेको छ ।
चोरीको प्रकृति हेर्दा निकै अनुभवी र विषयमा जानकार रहेको हुनसक्ने देखिन्छ ।गाउँपालिका तथा प्रहरी चौकी नजिकैको मुख्य व्यापारीक केन्द्रमै एकैसाथ धेरै घरमा चोरी हुँदा स्थानीयहरुले असुरक्षित महसुस गरेका छन ।
घटनाको विषयमा लगत संकलन तथा पीडितसँग सोधपुछ सहित थप अनुसन्धान भइरहेको खार प्रहरीका प्रमुख प्रहरी सहायक निरीक्षक दिपेन्द्र दर्लामीले बताए ।
उक्त श्रृखंलाबद्ध चोरीको घट्नामा प्रहरीले अनुसन्धान गरीरहेको र अहिलेसम्म कसैलाई समात्न नसकिएको प्रमुख दर्लामीले बताए ।
गाउँपालिकाको केन्द्र नजिकैको बजारमा भएको चरणबद्ध चोरीको घटनाले सुरक्षा चुनौती बढेको र चोरीको विषयमा सुरक्षा निकायसँग समन्वय भइरहेको गाउँपालिका अध्यक्ष गण्डकी थापा अधिकारीले बताए ।
