बागलुङ । प्रहरीले अफिम खेती गरेर चोप संकलन गरेको आरोपमा एकजना युवकलाई पक्राउ गरेको छ ।
लमजुङको मध्यनेपाल नगरपालिका–३ मा अफिम खेती गरेर चोप संकलन गरेको आरोपमा मकवानपुरको राक्सिराङ्ग गाउँपालिका वडा नम्बर–८ घर भएका २६ वर्षीय हिमाल लामा थिङलाई पक्राउ गरेको हो ।
ईलाका प्रहरी कार्यालय भोर्लेटारका प्रहरी निरीक्षक राजाराम खड्का नेतृत्वको टिमले अफिम खेती गरेर चोप संकलन गर्ने गरेको सुराकको आधारमा उनलाई नियन्त्रणमा लिएको हो । करिब ३ रोपनी जग्गामा उनले अफिम खेती गरेका खड्काले बताए ।
थिङले संकलन गरेको १०७ दशमलव ४ ग्राम अफिमको चोप बरामद गरिएको छ । मध्यनेपाल नगरपालिका–३ सुर्यपालस्थित लामाचौरमा विष्णु सुवेदीको जग्गामा विगत एक वर्षदेखि उनले अफिम खेती गरेको र प्रहरीले १४ हजार ५६६ बोट अफिमको बोट पनि बरामद गरेको छ ।
पक्राउ परेका थिङविरुद्ध अदालतबाट ७ दिनको म्याद लिएर अनुसन्धान भइरहेको प्रहरी निरीक्षक खड्काले नयाँ विश्वलाई बताए ।
