बागलुङ । धौलागिरी प्रादेशिक अस्पतालमा निःशुल्क मोतियाविन्दु शल्यक्रिया कार्यक्रम सम्पन्न भएको छ ।
अस्पतालको स्वीकृत वार्षिक कार्यक्रमअनुसार २०८३ वैशाख २८ गते सञ्चालन गरिएको शिविरमार्फत बागलुङ, पर्वत, म्याग्दी र मुस्ताङका ४२ जना बिरामीको सफल शल्यक्रिया गरिएको हो ।
यसअघि विभिन्न मितिमा चार जिल्लामा सञ्चालन गरिएको स्क्रिनिङ शिविरबाट शल्यक्रिया गर्नुपर्ने बिरामीको पहिचान तथा लगत संकलन गरिएको थियो ।
शल्यक्रिया कार्यक्रम हिमालयन आँखा अस्पताल पोखरा र धौलागिरी आँखा अस्पताल उपल्लाचौर बागलुङको प्राविधिक सहयोगमा सम्पन्न भएको हो ।
हिमालयन आँखा अस्पताल पोखराका कन्सल्टेन्ट अप्थाल्मोलोजिष्ट डा. नारायणी भट्टराई रोकाको संयोजकत्वमा विशेषज्ञ टोलीले शल्यक्रिया गरेको थियो ।
शल्यक्रियापछि सबै बिरामीको स्वास्थ्य अवस्था सामान्य रहेको धौलागिरी अस्पतालका कन्सल्टेन्ट अप्थाल्मोलोजिष्ट डा. कुशल गुरुङले जानकारी दिनुभयो ।
