राष्ट्रिय सहकारी बैंक लिमिटेडका सञ्चालक रामबहादुर जिसीले सहकारी क्षेत्रप्रति जनताको आकर्षण बढाउनका लागि जिल्लामा क्रियाशिल सहकारी संघहरुको भूमिका नेतृत्वदायी र प्रभावकारी हुनु पर्नेमा जोड दिनु भएको छ ।
जिल्ला सहकारी संघ लिमिटेड म्याग्दीको दशौ वार्षिक साधारणसभाको शविनार उद्घाटन पछि बोल्दै जिसीले यस्तो बताउनु भएको हो ।
सहकारी क्षेत्रको प्रवद्र्धनका लागि संघहरुलाई सक्षम बनाउन संस्थाहरुको सहयोग र संघहरुको समन्वयकारी भूमिका जोड दिदै जिसीले आम जनतामा सहकारी प्रतिको आकर्षण बढाउनका लागि नेतृत्वदायी भूमिका जिल्लामा रहेका सहकारी संघहरुले खेल्नु पर्नेमा जोड दिनु भएको हो ।
सहकारीका सदस्यहरुलाई आयआर्जन गर्न, वचत गर्न तथा उत्पादन कार्यमा लाग्न प्रारम्भिक सहकारी संस्थाहरुको भूमिका प्रभावकारी बन्दै गएको भन्दै उहाँले प्रारम्भिक सहकारीहरुले सदस्यको उत्पादन संकलन गरिदिने र त्यसको बजारीकरणको व्यवस्थापन जिल्ला संघहरुले गर्न सके सहकारीप्रति जनताको आकर्षण बढ्ने र आर्थिक समृद्धि समेत हुने जिसीको भनाइ थियो । 
कार्यक्रममा वचत तथा ऋण सहकारी संघ म्याग्दीका अध्यक्ष अमृता भण्डारी, जिल्ला समन्वय समिति म्याग्दीका सदस्य शेरबहादुर केसी लगायतले शुभकामना मन्तव्य व्यक्त गर्नु भएको थियो ।
कार्यक्रम जिल्ला सहकारी संघ लिमिटेड म्याग्दीका अध्यक्ष प्रेमबहादुर कार्की (दिपक बिखर्ची)को अध्यक्षता, सचिव रामप्रसाद सुवेदीको सञ्चालन र कोषाध्यक्ष जमुना आचार्यको स्वागतमा सम्पन्न भएको थियो ।
साधारणसभाले सचिव सुवेदीले प्रस्तुत गरेको प्रगति प्रतिवेदन र कोषाध्यक्ष आचार्यले प्रस्तुत गरेको आर्थिक प्रतिवेदन पारित गरेको छ ।
यसैबीच साधारणसभाले प्रेमबहादुर कार्की (दिपक बिखर्ची) को अध्यक्षतामा नयाँ सञ्चालक समिति सर्वसम्मत चयन गरेको छ ।
समितिको उपाध्यक्षमा ज्ञानप्रसाद सुवेदी, सचिवमा ज्योती लामिछाने, सहसचिवमा यामबहादुर खड्का र कोषाध्यक्षमा सुरेन्द्रराज शर्मा चयन हुनु भएको छ । 
समितिका सदस्यहरुमा यामबहादुर बाँनिया, रुद्रबहादुर रेग्मी, तेजकुमारी बाँनिया, निशा महत र देवीप्रसाद शर्मा रहनु भएको छ । साधारणसभाले भीमप्रसाद गौतम संयोजक तथा अमृता भण्डारी र मुक्तिप्रसाद सुवेदी सदस्य रहेको लेखा समिति चयन गरेको छ ।
