बागलुङ–बेनी सडक अवरुद्ध भएको तीन महिनासम्म पनि खुलाउन पहल नगरेको भन्दै स्थानीयले सडक डिभिजन कार्यालय, बागलुङ घेराउ गरेका छन् । उनीहरूले कार्यालय पुगेर ध्यानाकर्षणपत्र बुझाएका छन् ।
वर्षामा यसै पनि हिलाम्मे हुने सडक पहिरोसमेत थपिएपछि गत असारदेखि ठप्प छ । आफूहरूले व्यक्तिगत रूपमा लगानी गरेर एकतर्फी सडक खोले पनि पहिरोले फेरि चार घण्टामै अवरुद्ध भएको स्थानीयको गुनासो छ । उनीहरू दीर्घकालीन उपाय खोज्दै सडक डिभिजन पुगेका हुन् ।
पटकपटक सडक खुलाउन माग गरे पनि अटेरी गरिएपछि बाध्य भएर कार्यालय घेराउ गर्न आएको स्थानीय मातृका आचार्यले बताए । सडक थुनिँदा बागलुङ नगरपालिका–५ मालिका, म्याग्दीको बेनी नगरपालिका–१ रत्नेचौर र वडा नम्बर २ ज्यामरुकोटका बासिन्दालाई सास्ती छ । पहिरोले गत असार ८ देखि उक्त सडक बन्द भएको हो ।
बागलुङ नगरपालिका–५ बान्द्रे, म्याग्दीसँगको सिमाना ढोडेनी खोला पुलनजिकै र बेनी नगरपालिका–१ रानीवनमा पहिरो गएको छ । सडक खुलाउन लाखौं रुपैयाँ आवश्यक देखिएको तर कार्यालयमा पर्याप्त बजेट नभएकाले काम अघि बढाउन नसकिएको सडक डिभिजनले जनाएको छ ।
यद्यपि सडक डिभिजन कार्यालय, बागलुङका इन्जिनियर मुकुन्दप्रसाद लामिछानेले सडक खुलाउन आजैबाट पहल गर्ने बताए ।डिभिजन घेर्न गएका स्थानीयले बागलुङका प्रमुख जिल्ला अधिकारी सुरेश न्यौपानेलाई समेत ध्यानाकर्षणपत्र बुझाएका छन् । पत्र बुझ्दै न्यौपानेले पनि सडक खुलाउन तत्काल पहल थाल्ने बताए ।
यातायात साधन नचल्दा स्थानीयले उत्पादन गरेको कृषिजन्य सामग्री बजार पु¥याउन सकिएको छैन । दूध, अण्डा र मासुले बजार नपाउँदा करोडौं लगानीमा भैंसी फर्म र कुखुरा फर्म खोलेकाहरू मर्कामा छन् । ती फार्ममा दानासमेत ल्याउन सकिएको छैन ।
